Թուրքական Cumhuriyet թերթի փոխանցմամբ՝ բրիտանական Financial Times թերթում հրապարակվել է հունիսի 12-ին Թուրքիայում կայանալիք խորհրդարանական ընտրություններին նվիրված հոդված, որում ասվում է.
«Այդ ընտրություններում վարչապետ Էրդողանի գլխավորած «Արդարություն և զարգացում» կուսակցության (ԱԶԿ) հաղթանակը որևէ կասկած չի հարուցում, և միակն հարցն այն է, թե ինչ առավելությամբ է հաղթելու ԱԶԿ-ն։ Եվ որքան մեծ լինի ԱԶԿ-ի այդ առավելությունը, այնքան լավ կլինի թուրքերի համար։ ԱԶԿ-ի իշխանության շուրջ 9 տարիների ընթացքում Թուրքիայի տնտեսությունն արագ տեմպերով աճում է, ինչը բավական բարձրացրել է Էրդողանի վարկանիշը։
Եթե ԱԶԿ-ն խորհրդարանական ընտրությունների արդյունքներով 550 հոգանոց մեջլիսում ստանա 367 մանդատ, ապա նա միակողմանիորեն կարող է ամեն տիպի փոփոխություններ կատարել։ Էրդողանը կարող է անցում կատարել նախագահական համակարգին և դառնալ նախագահ»։
Հիշեցնենք, որ 2010 թվականին Թուրքիայի տնտեսությունը 8.9 տոկոսի աճ է արձանագրել, ինչն աննախադեպ իրադարձություն է Թուրքիայի Հանրապետության ավելի քան 87-ամյա պատմության ընթացքում: Այդ ցուցանիշով Թուրքիան Եվրոպայում գրավել է առաջին, իսկ աշխարհում՝ 3-րդ տեղը (Չինաստան՝ 10.3 տոկոս ու Արգենտինա՝ 9.2 տոկոս):
2010 թվականի դեկտեմբերի վերջին անգլիական The Economist պարբերականի խմբագիր Ջոն Փիթն իր վերլուծական հոդվածում կանխատեսել է, որ 2011 թվականին Թուրքիան առավել ազդեցիկ դեր կխաղա, քան նախկինում, ինչին նպաստելու է այն հանգամանքը, որ վերջին երկու տարիների ընթացքում Թուրքիայի տնտեսությունը Եվրոպայի ամենաարագ զարգացող տնտեսությունն է: