Թերթը գրում է. «Պետական համակարգում տարածում է գտել ևս մեկ հիվանդություն՝ «արտատպություն»։ Վարակն արդեն ախտահարել է երկու նախարարություն. էկոնոմիկայի նախարարության հիվանդությամբ վարակվել է մշակույթի նախարարությունը։ Եթե էկոնոմիկայի նախարարությունը «Առևտրի և ծառայությունների մասին» ՀՀ օրենքում լրացումներ կատարելու մասին փաթեթը (սահմանել մի շարք առաջին անհրաժեշտության ապրանքների առաստաղային գներ) գրեթե ամբողջովին արտատպել էր Ռուսաստանի «ՌԴ-ում առևտրային գործունեության պետական կարգավորման հիմունքների մասին» օրենքից, ապա մշակույթի նախարարությունը «Գորիսի զարգացման ծրագրի» հայեցակարգային նպատակների մեծ մասն արտատպել է էկոնոմիկայի նախարարության կողմից 2008 թ. մշակված Ջերմուկի զարգացման ծրագրի հայեցակարգից։
Հայաստանի կառավարությունը զբոսաշրջությունը հայտարարել է գերակա ուղղություն, և ըստ էության գործադիրին այնքան էլ հետաքրքիր չէ, թե որ գերատեսչությունն է զարգացնելու այդ գերակայությունը. կարևորն արդյունքն է։ Հայաստանում մինչև վերջերս զբոսաշրջության զարգացման համար պատասխանատու էր էկոնոմիկայի նախարարությունը, որտեղ առկա է զբոսաշրջության և տարածքային տնտեսության զարգացման վարչություն, բայց չգիտես՝ ինչու Գորիսի զբոսաշրջության զարգացմամբ որոշել է զբաղվել մշակույթի նախարարությունը»։
Թերթը տեղեկացնում է, որ Կառավարության հունիսի 10-ի նիստին քննարկվելու է մշակույթի նախարար Հասմիկ Պողոսյանի կողմից ներկայացվելիք «Գորիս քաղաքում զբոսաշրջության զարգացման մասին» որոշման նախագիծը. «Մշակույթի նախարարության կողմից պատրաստված փաստաթղթով Գորիս քաղաքը պետք է հայտարարվի զբոսաշրջային կենտրոն։ Որոշման նախագծում ամրագրված է, որ որոշումն ուժի մեջ մտնելուց հետո մշակույթի նախարարը վեցամսյա ժամկետում պետք է ապահովի Գորիս քաղաքի պատմամշակութային հիմնավորման նախագիծը և քաղաքի պատմական տարածքի, նրա առանձին հատվածների վերակառուցման ու օգտագործման հայեցակարգի մշակումը և ներկայացնի կառավարության հաստատմանը։
Էկոնոմիկայի նախարարն էլ նույն՝ վեցամսյա ժամկետում պետք է ապահովի Գորիս քաղաքում զբոսաշրջության զարգացման ծրագրի մշակումը և այն ներկայացնի կառավարության հաստատմանը», գրում է «Կապիտալ»-ը և հավելում. «Կառավարության կողմից Գորիսում զբոսաշրջության զարգացման ծրագրի հասցեագրումը հնարավոր է՝ պայմանավորված է այն հանգամանքով, որ քաղաքը հարուստ է պատմամշակութային և ճարտարապետական արժեքներով։ Բայց ըստ այդ նույն տրամաբանության՝ Ջերմուկում զբոսաշրջության զարգացումն էլ պետք է վստահվեր, օրինակ, առողջապահության կամ սպորտի և երիտասարդության նախարարություններին, քանի որ ցանկանում են զարգացնել Ջերմուկը նախևառաջ որպես առողջարանային զբոսաշրջության վայր՝ չեխական հեղինակավոր Կառլովի Վարի առողջարանային քաղաքի օրինակով»։