Երեկ Ռուսաստանի պաշտպանության նախարար Անատոլի Սերդյուկովն ասել է, որ հակահրթիռային պաշտպանության հարցում Ռուսաստանի և ՆԱՏՕ-ի միջև հակասությունները կրում են սկզբունքային բնույթ: Այս մասին հաղորդում է RIA-Novosti գործակալությունը:
Ռուսաստան-ՆԱՏՕ խորհրդի նիստից հետո, որին մասնակցում էին ՆԱՏՕ անդամ երկրների և ՌԴ պաշտպանության նախարարները, Սերդյուկովն ասել է, որ կողմերին չի հաջողվում հասնել համաձայնության հակաօդային պաշտպանության ճարտարապետության հարցի շուրջ: Միաժամանակ նա հույս է հայտնել, որ կողմերը կշարունակեն բանակցությունները:
Ռուսական կողմն առաջարկում է ՆԱՏՕ-ի հետ ստեղծել համատեղ համակարգ, որն իրենից կներկայացնի պատասխանատվությունների բաժանված սեկտորներ: Սրան հակառակ, և ինչի մասին երկու օր առաջ հայտարարել էր ՆԱՏՕ-ի գլխավոր քարտուղար Անդերս Ֆոգ Ռասմուսենը, Հյուսիսատլանտյան դաշինքն ասում է, որ պետք է ունենա իր առանձին համակարգը, սակայն պատրաստ է այս հարցում համագործակցել Ռուսաստանի հետ: