Վաշինգթոնն ու Բիշքեկը վերսկսել են բանակցությունները «Մանաս» ամերիկյան բազայի վարձակալությունը երկարացնելու հարցի շուրջ: Փորձագետները կարծիք են հայտնում, որ խոսքը ավելի երկարատև վարձակալության մասին է, քան սահմանվել էր 2009 թ.՝ 5 տարի ժամկետով: Այս մասին այսօր գրում է ռուսական Независимая газета-ն:
Երեկ այդ բազայի տնօրեն Դուայթ Սոունսը, որի պաշտոնավարման ժամկետն ավարտվում է, մամուլի ասուլիսի ժամանակ ասել է, որ Ղրղզստանի ղեկավարության հետ անցկացվում են բանակցություններ վարձակալության ժամկետի երկարաձգման շուրջ: Ըստ Սոունսի՝ բանակցություններն ընթանում են ինչպես դեսպանատների մակարդակով, այնպես էլ՝ անձամբ Ղրղզստանի ղեկավարության հետ: Սոունսը հույս է հայտնել, որ բանակցությունները հաջող կընթանան, քանի որ «Ղրղզստանի կառավարությունը շահագրգռված է «Մանասի» ներկայությամբ»: Իսկ այն հարցին, թե արդյոք չի՞ մանրամասնի և նշի, թե քանի տարով է երկարաձգվելու «Մանասի» վարձակալությունը, պատասխանել էր, թե «ոչ հավիտյան»:
Սոունսը նաև հույս է հայտնել, թե կգա ժամանակ, որ այս բազան ոչ միայն կծառայի ռազմական բեռների տեղափոխման, այլ նաև ինքնաթիռների վերալիցքավորման համար: «Իսկ երբեմն էլ՝ նաև ԱՄՆ պետքարտուղար Հիլարի Քլինթոնի ինքնաթիռի (վերալիցքավորման.- 1in.am) համար»,- ասել է «Մանասի» տնօրենը:
Ռուսաստանի գիտությունների ազգային ակադեմիայի արևելագիտության ինստիտուտի ավագ գիտաշխատող Ալեքսանդր Կնյազևը կարծիք է հայտնել, որ այստեղ խոսքը ոչ միայն «Մանասի» վարձակալության երկարաձգման մասին է, այլև Ղրղզստանում ամերիկյան ավելի երկար ներկայության: Նա ասել է, որ ԱՄՆ-ն ընդհանուր առմամբ փոխում է իր քաղաքականությունը տարածաշրջանում: Կնյազևը կարծիք է հայտնել, որ Աֆղանստանից որոշ ռազմաբազաների դուրս բերման արդյունքում դրանք կարող են տեղափոխվել ավելի հյուսիս՝ Տաջիկստան, Ուզբեկստան և Ղրղզստան: Դրա համար, ըստ փորձագետի, արվում է ամեն ինչ՝ սկսած հզոր ռազմաբազաների կառուցումից, ինչպիսին, օրինակ, աֆղանական Մազարի Շարիֆում է, վերջացրած այն քարոզչությամբ, որ այդ ներկայությունը կարևոր է տարածաշրջանի համար:
Հիշեցնենք նաև, որ ամերիկացիները «Մանասի» ռազմաբազան օգտագործում են 2001 թվից, երբ ԱՄՆ-ն պատերազմ սկսեց Աֆղանստանի դեմ: Ղրղզստանի նախորդ իշխանությունը Ռուսաստանի միջամտությամբ փորձում էր ամեն ինչ անել այս ռազմաբազան փակելու համար, սակայն հատկապես իշխանափոխությունից հետո խոսակցություններն ամերիկացիների հեռանալու մասին դադարել են: