ԱՄՆ պետքարտուղար և նախկին առաջին տիկին Հիլարի Քլինթոնը դարձել է «Քաղաքական ուժ» կոմիքսների հերոս: Մանրապատումները հայտնվել են ամերիկյան խանութներում երեկ: Հեղինակի մտահղացմամբ, այդ կոմիքսները պետք է պատմեն քաղաքական կարիերայի ընթացքում Հիլարի Քլինթոնի վերելքի մասին:
Հրատարակողները պնդում են, որ կոմիքսները բավական լուրջ են ստացվել և առաջին հերթին նախատեսված են մեծահասակների համար: «Մեր նպատակն էր ցույց տալ բոլոր խարդավանքներն ու դավերը, որոնք ուղեկցել են Հիլարի Քլինթոնին պետքարտուղար դառնալու ճանապարհին, և որոնք, որպես կանոն, անտեսվում են հիմնական լրատվամիջոցների կողմից»,- ասել է հրատարակիչ Դերեն Դևիսը:
Սա առաջին դեպքը չէ, երբ պետքարտուղարը դառնում է կոմիքսների հերոս: Առաջին անգամ նա հայտնվել էր մանրապատումներում 2009 թ., երբ այդ հրատարակության տպաքանակը եղել էր 20 հազար օրինակ: Բայց, ի տարբերություն նախորդ կոմիքսների, որոնք հայտնի կանանց մասին շարք էին ներկայացնում, այս դեպքում ներկայացված է առանձին Հիլարի Քլինթոնը՝ որպես քաղքական գործիչ, նպատակաուղղված անձ և հոգեկան ապրումներով, հույզերով ու նպատակներով լի կին: