Ռազմավարական մշակույթի ռուսական հիմնադրամի փոխնախագահ Անդրեյ Արեշևի գնահատմամբ, ԼՂ հակամարտության գոտում խաղաղապահ ուժերի տեղակայման հարցն այսօր ԼՂ խնդրի կարգավորման հիմնական և առաջնային հարցերի ցանկին չի պատկանում:
«Կարծում եմ՝ նման հայտարարությունների պատճառն այն է, որ Կազանի հանդիպումից առաջ իրավիճակը թեժանում է, և կողմերը, հետաքրքրված լինելով բանակցությունների այս կամ այն արդյունքով, միջնորդներին որոշակի ազդակներ են ուղարկում»,- «Առաջին լրատվականի» հետ զրույցում, մեկնաբանելով Ադրբեջանի արտգործնախարարի հայտարարությունը, թե արդեն համաձայնեցված է ԼՂ-ում խաղաղապահ ուժեր տեղակայելու հարցը, նշեց Արեշևը:
Ռուսաստանցի փորձագետը ևս մեկ անգամ ընդգծեց, որ խաղաղապահների տեղակայումը շատ լուրջ, բազմաշերտ և բարդ հարց է, և բնականաբար տրամաբանական չէ, որ այն կքննարկվի այն ժամանակ, երբ դեռևս լուծված չեն առավել զգայուն հարցերը:
Մեր հարցին, թե Կազանի՝ Սարգսյան-Ալիև-Մեդվեդև հանդիպման ժամանակ խաղաղապահների տեղակայման հարցը կքննարկվի՞, Արեշևը պատասխանեց. «Դժվար է մեկնաբանել կազանյան հանդիպման օրակարգը, բայց, ամեն դեպքում, կարծում եմ, որ խաղաղապահների տեղակայման հնարավորության կամ անհնարինության հարցը պետք է շատ լուրջ քննարկվի և վերլուծվի բոլոր կողմերի մասնակցությամբ»: