«Կանանց ռեսուրս կենտրոն»-ին 2010 թ. ընթացքում դիմած 320 կանանց 40%-ը զուտ սեռական բռնության է ենթարկվել, իսկ 30%-ը՝ սեռական բռնության ենթարկվել է ծանոթ մարդու կողմից։ Անցյալ տարի սեռական բռնութան կիրառման երեք դեպք է գրանցվել Հայաստանի սահմանն անցած տուրիստ կանանց հանդեպ։
Ըստ «Կանանց ռեսուրս կենտրոնի» համահիմնադիր Լարա Ահարոնյանի՝ կանանց հանդեպ սեռական ոտնձգությունների մեծ մասը կատարվում են աշխատավայրերում՝ հատկապես վերադաս աշխատողների կողմից և ուղեկցվում են աշխատանքից ազատման սպառնալիքներով։ Կենտրոնին դիմել է երկու կին, ովքեր սեռական բռնության են ենթարկվել իրենց բուժող բժշկի կողմից, ևս երկուսը՝ ոստիկանի կողմից։
Մարդու դեմ հանցագործությունների վարչության պետի տեղակալ Արթուր Դավթյանի խոսքով, այս տարի ավելի շատ կին է դիմել ոստիկանություն՝ սեռական բռնության բողոքով։ Եթե 2009 թ. ոստիկանություն այս խնդրով դիմել է 73 կին, ապա 2010 թ.՝ 82։ Սակայն այս ցուցանիշը վկայում է կանանց մոտ իրազեկության բարձրացման, այլ ոչ թե դեպքերի աճի մասին։
Ըստ Արթուր Դավթյանի՝ պետք է մշակել ճկուն մեխանիզմ բռնության դեպքերի բացահայտման և մեղավորներին արդարացիորեն պատժելու համար։ «Որպեսզի որևէ մեկին քրեական պատասխանատվության ենթարկենք, անհրաժեշտ է, որպեսզի տուժածն ապացուցի, որ իր դեմ կատարվել է բռնություն, քանի որ շատ են լինում նաև կեղծ մեղադրանքներ»,- ասում է Արթուր Դավթյանը։