Այն, որ Թուրքիայում կայանալիք առաջիկա խորհրդարանական ընտրություններում վարչապետ Էրդողանի ղեկավարած «Արդարություն և զարգացում» կուսակցությունը հաղթելու է՝ կասկածից վեր է։
Այս մասին «Առաջին լրատվականի» հետ զրույցում նշեց թուրքագետ Արտակ Շաքարյանը, ում կարծիքով, խորհրդարանում 25-30% ձայնով ներկայացված կլինի նաև մայր ընդդիմություն համարվող «Ժողովրդահանրապետական» կուսակցությունը։
«Քրդերը՝ «Խաղաղություն և ժողովրդավարություն» կուսակցությունը, մեծամասնական ցուցակներով 20-25 անկախ պատգամավոր կունենան խորհրդարանում. սա ևս հստակ է, բայց «Ազգայնական շարժում» կուսակցությունը սահմանի վրա է.10% պետք է հավաքեն, որ անցնեն: Իրենք այսօր 9 և 11% միջև են»։
Ըստ Շաքարյանի՝ եթե ազգայնականները չկարողանան հաղթահարել այդ շեմը, և Էրդողանը կրկին ունենա ձայների մեծամասնություն, կկարողանա անխոչընդոտ փոխել Սահմանադրությունը և դառնալ Թուրքիայի լիարժեք տերը. «Պուտինյան Թուրքիա կստեղծի, այսինքն` առաջիկա տասը տարիներին կլինի Թուրքիայի նախագահը»։
«Առաջին լրատվականի» հարցին, թե ի՞նչ փոփոխությունների կարող է բերել այս պատկերը Թուրքիայի ներքին և արտաքին քաղաքականության մեջ, Արտակ Շաքարյանը պատասխանեց.
«Եթե ազգայնականները մտնեն խորհրդարան, Էրդողանը ստիպված կլինի հավասարակշիռ քաղաքականություն վարել, բացարձակ «տեր ու տիրական չի լինի», իսկ եթե ազգայնականները չլինեն խորհրդարանում, ինքը կլինի անկառավարելի։ Եթե Էրդողանը լինի լիարժեք մարդ-պետություն, ավելի ագրեսիվ կլինի։ Ինչքան Թուրքիայում հավասարակշռված լինի քաղաքականությունը, ինչքան Թուրքիան գնա դեպի ներքին գզվռտոց, այնքան արտաքին հարաբերություններում ավելի թույլ կլինի, ինչը ձեռնտու է Հայաստանին»։
Ըստ այդմ՝ ինչքան շատ ձայն հավաքի ազգայնական կուսակցությունը, ըստ Շաքարյանի, շատ ավելի լավ կլինի։