Грузия Online-ի փոխանցմամբ՝ Վրաստանի արտգործնախարար Գրիգոլ Վաշաձեն գերմանական Die Presse պարբերականին տված հարցազրույցում սուր քննադատության է ենթարկել Ռուսաստանին.
«Որևէ կասկած չկա, որ Ռուսաստանը փորձում է ապակայունացնել իրավիճակը Վրաստանում, ինչի մասին են վկայում թիվ 9 և 10 ահաբեկչությունների փորձերը։ Այդ ահաբեկիչները նախապատրաստվել էին Ռուսաստանում և ֆինանսավորվել նրա կողմից։
Սխալ է կարծել, թե Ռուսաստանը կարևոր երկիր է Վրաստանի համար։ Մենք ոչինչ չենք ներկրում Ռուսաստանից և ոչինչ չենք արտահանում Ռուսաստան։ 2006 թվականին Ռուսաստանը բեռնարգելք կիրառեց Վրաստանի նկատմամբ՝ նպատակ ունենալով կործանել մեր տնտեսությունը։ Մենք դրա համար շնորհակալ ենք Մոսկվային, քանի որ դրանով մեր տնտեսությունը փորձություն անցավ։ Միակ բանը, որ կապում է երկու երկրներին, դա էլեկտրաէներգիան է, որը Վրաստանը վաճառում է Ռուսաստանին։
Վրաստանը կհայտնվի առավել շահեկան վիճակում, եթե կարգավորվեին Ռուսաստանի հետ հարաբերությունները, սակայն դա չպետք է տեղի ունենա Վրաստանի ազգային շահերի հաշվին։ Ներկայիս ստատուս քվոն անընդունելի է բոլորի համար։ Եթե ես հանդիպեի Ռուսաստանի արտգործնախարար Սերգեյ Լավրովի հետ, ապա նրան կհայտնեի, որ վաղուց պետք էր երկխոսություն սկսել ու լուծել մեր առջև ծառացած խնդիրները։
Ինչ վերաբերում է Ռուսաստանի ներքին դրությանը, ապա Պուտինը Ռուսաստանի բացարձակ տիրակալն է։ Հենց նա է կայացնում քաղաքական, ֆինանսական, ռազմական ու իրավական բոլոր հարցերի որոշումները»։
Հիշեցնենք, որ երեկ էլ Վրաստանի նախագահ Միխեիլ Սաակաշվիլին The New Times պարբերականին տված հարցազրույցի ժամանակ նշել էր, որ վրացական կողմն ակնհայտ անհերքելի ապացույցներ ունի, որ Ռուսաստանի Գլխավոր հետախուզական վարչության (ԳՀՎ) դիվերսիոն ստորաբաժանումներն Աբխազիայի և Հարավային Օսիայի տարածքում պատրաստում են համապատասխան խմբեր՝ Վրաստանում պայթեցումներ իրականացնելու համար։