1980-ականներին արքայադուստր Դիանայի կողմից գրված նամակներն ու բացիկները կվաճառվեն աճուրդի ժամանակ: Այս մասին գրում է The Daily Maily-ը: Նամակներն ու բացիկները, որոնք ուղղված են եղել նրա ընկերուհուն՝ Մարգարետ Հոջին, կվաճառվեն Reeman Dansie աճուրդների տանը:
Հոջն անձամբ է հանել այդ նամակներն աճուրդի: Դրանք հետաքրքիր մանրամասներ են պարունակում 20-րդ դարի 80-ական թվականներին արքայադստեր կյանքի մասին: Դիանան դրանցում պատմել է արքայազն Չարլզի հետ համատեղ կյանքի, որդիների՝ Ուիլյամի և Հարրիի մասին: «Նա շատ զբաղված կին էր, սակայն միշտ ժամանակ էր գտնում, որպեսզի մի քանի տող գրեր ինձ»,- ասել է Հոջը:
Reeman Dansie աճուրդների տան ներկայացուցիչն ասել է, որ այդ նամակների մասին նախկինում ոչ մի բան հայտնի չի եղել, սակայն հիմա, երբ դրանց մասին հայտնի է դարձել, հնարավոր է, որ ուշադրությունը դրանց նկատմամբ աճի: Ենթադրվում է, որ այդ նամակներն ու բացիկները կարող են վաճառվել առնվազն 22 հազար եվրոյով: