Երևանի քաղաքապետի աշխատանքային շրջայցերը վարչական շրջաններ շարունակվում են: Էրեբունի վարչական շրջանում Կարեն Կարապետյանի շրջայցը սկսվեց Էրեբունու գյուղմթերքների շուկայից:
Մայրաքաղաքում գործող շուկաների տնօրենների առջև դեռևս տարեսկզբին Երևանի քաղաքապետի կողմից հստակ խնդիր էր դրվել` շուկաներում պահպանել անհրաժեշտ պայմաններն ու սանիտարական պատճաշ վիճակը: Այս շուկայում վերջերս թարմացվել են առևտրային տաղավարները, բայց անելիքները դեռևս շատ են:
Ծանոթանալով շուկայում առկա պայմաններին՝ Կարեն Կարապետյանը տնօրենին հորդորեց ապահովել համապատասխան պահանջների կատարումը:
Վարչական շրջանի ղեկավարի ուղեկցությամբ քաղաքապետը ծանոթացավ նաև
Էրեբունիում իրականացվող բարեկարգման ծրագրերի ընթացքին:
Մուրացանի 113/1 հասցեում գտնվող բակն ամբողջությամբ վերջերս է վերանորոգվել` տեղադրվել են նստարաններ, զրուցարաններ, կենտրոնում կառուցվել է արձանով շատրվան:
Բնակիչների համար օրը տոնական էր Ավանեսով 7/1 բակում: Այստեղ շահագործման հանձնվեց ժամանակակից խաղահրապարակով կահավորված բակը, որը փոքրիկ բնակիչների համար ամենասպասված և ամենացանկալի նվերն էր:
Քաղաքապետը զրուցեց տարածքի համատիրությունների ղեկավարների հետ, ծանոթացավ նրանց աշխատանքին և օրինակելի համարեց մասնավորապես «Արգիշտի» համատիրության գործունեությունը: Այստեղ, ինչպես համատիրությունը, այնպես էլ բնակիչները գիտեն իրենց իրավունքներն ու պարտականությունները: Արդյունքում բակը բարեկարգ է, մուտքերի դռները փոխված, վերելակի հետ կապված խնդիրներն էլ ժամանակին են լուծվում:
Կարևորելով վարչական շրջան-համատիրություն-բնակիչ համատեղ աշխատանքը՝ Կարեն Կարապետյանը նշեց, որ այս կերպ աշխատանքը կլինի առավել կանոնակարգված և առաջացած խնդիրներն էլ կլինեն հասցեագրված ու ժամանակին լուծում կստանան:
Սասունցի Դավթի արձանին հարակից տարածքն այս տարի նորովի է կանաչապատվել:
Երևանի քաղաքապետի հանձնարարությամբ վարչական շրջաններից յուրաքանչյուրում կստեղծվեն ժամանցային և մշակութային ուղղվածությամբ փոքր կենտրոններ: Էրեբունիում բնակիչների ժամանցի կազմակերպման յուրօրինակ վայր կդառնա հենց երկաթուղային կայարանի հարակից այս հրապարակը:
Կարեն Կարապետյանը ծանոթացավ նաև «Լիոնի» այգում ընթացող աշխատանքների ընթացքին:
Մայրաքաղաքում «Լիոնի» այգու հիմնումը Երևանի և Լիոնի քաղաքապետարանների միջև կնքած 2008-2011 թթ.-ի համագործակցության ծրագրի շրջանակում է իրականացվում:
Շրջայցից հետո քաղաքապետ Կարեն Կարապետյանը աշխատանքային խորհրդակցություն է հրավիրել վարչական շրջանի աշխատակազմի հետ:
Անդրադառնալով աղբահանության կազմակերպման, կանաչապատման, ինքնակամ շինարարության, սեփական եկամուտների հավաքագրման և վարձակալությամբ տրված տարածքների խնդիրներին՝ քաղաքապետը տվել է մի շարք հանձնարարականներ: