Ադրբեջանական APA լրատվական գործակալության փոխանցմամբ՝ Լեռնային Ղարաբաղում գտնվող ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ռոբերտ Բրադտկեն (ԱՄՆ), Բեռնար Ֆասիեն (Ֆրանսիա), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկն այսօր պատասխանել են լրագրողների հարցերին։
Բեռնար Ֆասիեն դրական է գնահատել վերջին մեկ տարվա ընթացքում միջնորդների երրորդ այցելությունը հայ-ադրբեջանական շփման գիծ. «Դա ցույց է տալիս, որ համագործակցությունը հնարավորություն է տալիս առավել լավ պահպանել զինադադարի ռեժիմը։ Հուսով եմ, որ հայ-ադրբեջանական շփման գծի այսպիսի հատման դեպքերը կկրեն կանոնավոր բնույթ։ Դովիլյան հայտարարությունը շատ կարևոր գործոն է։ Նախագահներն ընդգծեցին, որ լավ կլիներ շուտափույթ ժամկետում հիմնարար սկզբունքների համաձայնեցումը, ինչից հետո կարելի կլինի ձեռնամուխ լինել հակամարտության խաղաղ ճանապարհով կարգավորման նախագծի իրագործմանը»։
Բրադտկեն իր հերթին նշել է, որ ԼՂՀ նախագահ Բակո Սահակյանի հետ քննարկել են վերջին 2-3 ամիսների զարգացումները. «Դիվանագիտական տեսանկյունից դա լարված ժամանակաշրջան էր։ Ուժային մեթոդները կհանգեցնեն միայն առավել մեծ քանակությամբ մարդկանց զոհվելուն ու տանջվելուն։ Ուժի կիրառման միջոցով խնդրի լուծումն անհնար է»։
Իգոր Պոպովը նշել է, որ չի հանդիսանում «նորացված մադրիդյան սկզբունքներ» ձևակերպման կողմնակից. «Յուրաքանչյուր հանդիպմանը ներկայացվում են առաջարկություններ, և օրակարգում կա նախագիծ, որի որոշ հարցերի վրա արտգործնախարարներն աշխատանքներ են տանում: Եթե կողմերն իրենց համաձայնությունը տան կարգավորման սկզբունքների վերջին՝ երեք ամիս առաջ Սոչիում կայացած հանդիպման ժամանակ քննարկված տարբերակին` հնարավոր է, որ դրա շուրջ աշխատանքն ավարտվի Կազանում»։
