Թուրքագետ Վահրամ Տեր-Մաթևոսյանը այսօր ՀՀ ԳԱԱ Արևելագիտության ինստիտուտում կազմակերպված Թուրքիայի նախընտրական շրջանին նվիրված քննարկման ժամանակ տեղեկացրեց, որ Թուրքիայի հունիսի 12-ին կայանալիք ընտրություններին մասնակցելու է 15 կուսակցություն, որոնցից միայն երեքի կամ չորսի մեջ է ընթանալու պայքարը բավականին բարձր 10 տոկոսանոց ընտրաշեմը հաղթահարելու համար:
Էրդողանի ղեկավարած «Արդարություն և զարգացում» կուսակցությունը, Տեր-Մաթևոսյանի խոսքերով, ի սկզբանե ակնկալում էր խորհրդարանում ունենալ 367 մանդատ. «Սակայն արդեն ընտրապայքարի կեսին նա հասկացավ, որ այդ պայքարն այդքան էլ հեշտ չի լինելու և արդեն վերջին շրջանում բավականին համեստ է իր ակնկալիքներում՝ հուսալով, որ գոնե 330 մանդատ կկարողանա ապահովել, ինչն էլ հնարավորություն կտա Էրդողանին առաջ տանել իր ծրագրերը, հատկապես սահմանադրական բարեփոխումները»:
Տեր-Մաթևոսյանի գնահատմամբ, խորհրդարանական ընտրությունները կարևոր են նաև նրանով, որ դրանց հաջորդելու են Թուրքիայի առաջին նախագահական ընտրությունները, որոնց Էրդողանն առաջադրվելու է և սպասում է հենց խորհրդարանականի արդյունքներին:
Ժողովրդահանրապետական կուսակցության հնարավորություններին անդրադառնալով՝ թուրքագետը նշեց, որ վերջիններս սկանդալային պատմությունների մեջ էին, և նրանց ղեկավարը ստիպված էր հրաժարական տալ, սակայն նոր ղեկավարին հաջողվել է մեկ տարվա մեջ անել անհնարինը՝ նոր շունչ հաղորդել կուսակցությանը և հասնել նրան, որ այդ կուսակցությունը առաջիկա ընտրություններում 26 տոկոս վստահության քվե կարող է ստանալ:
«Ազգայնական շարժում» կուսակցությանն անդրադառնալով՝ Վահրամ Տեր-Մաթևոսյանը նշեց, որ այս կուսակցությունը նախընտրական շարժումը սկսել է կաթվածահար վիճակում՝ սկանդալային տեսաերիզները մեծ բողոք առաջացրեցին կուսակցության համակիրների շրջանում. «Հավանական է, որ ինչ-որ դարակներում կան նաև այլ վարկաբեկող տեսաերիզներ կուսակցության անդամների վերաբերյալ: Այդ կուսակցության՝ խորհրդարան անցնել-չանցնելը մեծապես կախված է նրանից, թե ինչպիսի քաղաքականություն կկիրառի Թուրքիան: Եթե նրանց հաջողվի հաղթահարել պահանջվող 10 տոկոսը, ապա նա խորհրդարանում կունենա 50-60 պատգամավոր, ինչն, իհարկե, բավարար չէ գործընթացների վրա որևէ լուրջ ազդեցություն ունենալու համար»:
Վահրամ Տեր-Մաթևոսյանը նաև նշեց, որ Թուրքիայում կիրառվում են Արևելքում ընդունված կաշառքի ձևերը, օգտագործվում՝ վարչական ռեսուրսը, որպես կաշառք բաժանվում է նաև ոսկի:
Արևելագիտության ինստիտուտի աշխատակիցներից մեկն էլ արձագանքեց, որ քրդական համայնքում շատ ընդունված է որպես կաշառք լվացքի մեքենաներ բաժանելը: