Ադրբեջանական Salam News գործակալության փոխանցմամբ՝ Ադրբեջանի նախագահ Իլհամ Ալիևի սերբական պաշտոնական այցի շրջանակներում Սերբիայի մայրաքաղաք Բելգրադում տեղի է ունեցել երկու երկրների պատվիրակությունների նիստը։
Դրա արդյունքներով, Ադրբեջանի ու Սերբիայի միջև ստորագրվել է 7 համաձայնագիր և 5 հուշագիր, որոնք առնչվում են տարբեր ոլորտներում երկու երկրների համագործակցությանը։
Մասնավորապես, խոսքը գնում է արտակարգ իրավիճակների, մաքսային, ներդրումների պաշտպանվածության, կրթական, սպորտի ու երիտասարդության, շրջակա միջավայրի պահպանման, մշակութային ոլորտներում համագործակցության մասին։
Երկու երկրների նախագահները միմյանց աջակցություն են հայտնել տարածքային ամբողջականության հարցերում։
Հիշեցնենք, որ Ադրբեջանում Սերբիայի դեսպանատունը բացվել է այս տարվա մարտին, սակայն ցայժմ դեսպան չուներ, և Ադրբեջանում Սերբիան ներկայացնում էր ժամանակավոր լիազոր անձը:
Ի դեպ, մայիսի սկզբին Սերբիա էր այցելել Ադրբեջանի արտգործնախարար Էլմար Մամեդյարովը: Նրա այցի արդյունքում հայտնի դարձավ, որ Ադրբեջանի նախագահ Իլհամ Ալիևը հունիսի 8-9-ը այցելելու է Սերբիա:
Իսկ մայիսի 26-ին Ադրբեջանի նախագահ Իլհամ Ալիևն ընդունել է Ադրբեջանում Սերբիայի առաջին դեսպան Զորան Վայովիչի հավատարմագրերը: