Վերահսկիչ պալատի նախագահ Իշխան Զաքարյանն այսօր խորհրդարանում ներկայացրեց ՎՊ 2009 թ. տարեկան հաշվետվությունը: Եվ պետք է նշել՝ ՎՊ բացահայտած թերությունները հերթական անգամ վկայեցին երկրում տիրող իրավիճակի մասին: Օրինակ՝ անդրադառնալով սոցիալական ծրագրերի իրականացմանն ուղղվող պետական բյուջեի միջոցների ստուգմանը, Զաքարյանն ընդգծեց, որ այդ իմաստով մեր երկրում ձևավորվել է մի իրավիճակ, երբ աջ ձեռքը չգիտի, թե ինչ է անում ձախը, և հակառակը: «Ստուգումների ժամանակ ակնհայտորեն պարզ դարձավ, որ թոշակներ ու նպաստներ ստանում են մարդիկ, ովքեր ունեն, ասենք, 250 գլուխ խոշոր եղջերավոր անասուն կամ մի քանի արտասահմանյան շքեղ ավտոմեքենաներ»,- ներկայացրեց նա ու բացատրեց` սա էլ գալիս է նրանից, որ, նախ, ունենք թերի օրենսդրական կարգավորման դաշտ, բացի այդ՝ նպաստներ նշանակող անձը մեկն է, տեղեկանք տրամադրողը՝ մյուսը, և այդպես խառնաշփոթ իրավիճակ է ստեղծվում:
Իսկ համապատասխան ստուգումների արդյունքում էլ ի հայտ եկած թվերը հետևյալն են։ Միայն Վանաձորում, օրինակ, 403 գործերի ստուգման ժամանակ պարզ է դարձել, որ գործ ունեն 53 մլն դրամի խախտման հետ, իսկ Գյումրիում ստուգված 136 գործով գրանցվել է 16 մլն դրամի խախտում: Հասկանալի է, որ նմանատիպ իրավիճակ է գրեթե բոլոր համայնքներում:
Իշխան Զաքարյանը նաև հայտարարեց, թե ՎՊ-ի կողմից ընդհանուր առմամբ արձանագրվել է 6 380 000 դրամ վերականգնվող գումար, ևս 1 307 000 դրամը վերահսկիչ պալատի կողմից արձանագրվել է որպես անարդյունավետ ծախս: Վերահսկիչ պալատին ուղարկված նամակների հիման վրա արձանագրվել է, որ խախտումներից 2 619 335 դրամը հետ է փոխանցվել պետական և համայնքային բյուջեներ, կամ այլ հաշիվների վրա, 608 մլն դրամ վերականգնվել է լրացուցիչ կատարված աշխատանքների տեսքով, 1 727 000 դրամի մասով նյութերը գտնվում են ՀՀ դատախազությունում կամ դատարաններում, դրանց նկատմամբ հարուցված են դատական հայցեր, 133մլն դրամի մասով ձեռնարկված են համապատասխան միջոցներ:
