Новости Армении-ի փոխանցմամբ՝ այսօր ԼՂՀ նախագահ Բակո Սահակյանն ընդունել է ԵԱՀԿ Մինսկի խմբի նախագահներ Ռոբերտ Բրադկեին (ԱՄՆ), Իգոր Պոպովին (Ռուսաստան) ու Բեռնար Ֆասիեին (Ֆրանսիա)։
Հանդիպման ժամանակ Սահակյանը հերթական անգամ ներկայացրել է պաշտոնական Ստեփանակերտի դիրքորոշումը՝ ընդգծելով, որ առանց ԼՂՀ մասնակցության ղարաբաղյան հակամարտության կարգավորման բանակցային գործընթացում անհնարին կլինի որևէ լուրջ առաջընթաց գրանցելը։
Իգոր Պոպովն իր հերթին նշել է, որ ՌԴ, ԱՄՆ և Ֆրանսիայի նախագահների դովիլյան հայտարարությունը հավելյալ ազդակ կհաղորդի հիմնարար սկզբունքների վրա տարվող աշխատանքների շուտափույթ ավարտմանը. «Մենք հուսով ենք, որ հակամարտող կողմերը կառուցողական մոտեցում կցուցաբերեն առաջիկայում Կազանում կայանալիք նախագահների հանդիպման ժամանակ։
Դրանից առաջ Մոսկվայում կայանալիք Հայաստանի, Ադրբեջանի ու Ռուսաստանի արտգործնախարարների հանդիպման ժամանակ կքննարկվեն հիմնարար սկզբունքների վերջնական ձևակերպումները, որոնք կողմերին կներկայացվեն կազանյան հանդիպման ժամանակ»։
Բացի ղարաբաղյան հակամարտության կարգավորումից, կողմերը քննարկել են նաև տարածաշրջանային խնդիրներ։ Հանդիպմանը ներկա են եղել նաև ԼՂՀ արտգործնախարար Գեորգի Պետրոսյանը, ԵԱՀԿ գործող նախագահի անձնական ներկայացուցիչ Անջեյ Կասպրշչիկը (Լեհաստան) և այլ պաշտոնատար անձինք։
Հիշեցնենք, որ արտգործնախարարների մոսկովյան եռակողմ հանդիպումը կայանալու է հունիսի 11-ին, իսկ նախագահների կազանյան եռակողմ հանդիպումը՝ հունիսի 25-ին։
