Facebook-ը, ինչպես և սպասվում էր, վերջապես պաշտոնապես ներկայացրեց իր փոստային ծառայությունը: Տեղի ունեցած մամուլի ասուլիսի ժամանակ ընկերության հիմնադիր Մարկ Ցուկենբերգերը բացահայտել է, թե ինչ է իրենից ներկայացնում նրանց նոր` «Project Titan» կոդային անվանումով նախագիծը: Ըստ այդմ, համացանցի սոցիալական գերհսկայի օգտատերերի փոստային արկղերը ինտեգրված են լինելու հենց ֆեյսբուքյան պրոֆիլներում և ներառելու են տեքստային հաղորդակցման բոլոր բաղադրիչները` էլ. փոստ, չաթ, կարճ հաղորդագրություններ (SMS): Ինչպես և գլխավոր մրցակից Gmail-ը, Facebook-ը նույնպես հնարավորություն է տալու ձեռքի տակ ունենալ բոլոր նամակների և չաթի արխիվը, որոնել, ինչպես նաև զտել դրանք: Ի տարբերություն Google mail-ի` Facebook-ի փոստը ունենալու է այդ ցանցում գտնվող ընկերների և այլոց կողմից ուղարկված նամակների առանձին արկղեր:
Facebook-ի վերափոխված փոստը հասանելի կլինի ցանցի բոլոր 500+ մլն օգտատերերին առաջիկա մի քանի ամսվա ընթացքում: Առայժմ դրանից կարող են օգտվել միայն ընկերության մի խումբ աշխատակիցներ և բետա փորձարկողներ: