Грузия Online-ի փոխանցմամբ, Վրաստանի նախագահի մամլո քարտուղար Մանանա Մանջգալաձեն Эхо Москвы-ին տված հարցազրույցի ժամանակ հերքել է ռուսական ԶԼՄ-ներում շրջանառության մեջ մտած այն լուրը, թե Վրաստանը մտադիր է հրաժարվել Առևտրի համաշխարհային կազմակերպությանը (ԱՀԿ) Ռուսաստանի անդամակցության հարցում ունեցած իր նախկին դիրքորոշումից։
Մանջգալաձեն, սակայն, չի մեկնաբանել ռուսական ԶԼՄ-ների կողմից այդ տեղեկատվության շրջանառության մեջ դրվելու լուրը։
Մասնավորապես Независимая газета-ն, հենվելով վրաց ընդդիմադիրների աղբյուրների վրա, տեղեկատվություն էր տարածել, թե ԱՄՆ փոխնախագահ Ջոզեֆ Բայդենի ճնշման տակ Սաակաշվիլին տեղի է տվել այդ հարցում։
Հիշեցնենք, որ Ռուսաստանը ցանկանում է ԱՀԿ-ին անդամակցել դեռևս 1993 թվականից, ինչին խոչընդոտում է Վրաստանը:
2008 թվականի օգոստոսին տեղի ունեցած ռուս-վրացական հնգօրյա պատերազմից հետո՝ այս տարվա մարտի 10-ին, Ռուսաստանն ու Վրաստանն առաջին անգամ Շվեյցարիայի Բեռն քաղաքում ԱՀԿ-ին Ռուսաստանի անդամակցության համար նստեցին բանակցությունների սեղանի շուրջը:
Սակայն դա ավարտվեց անարդյունք, քանի որ Ռուսաստանը Վրաստանից պահանջում էր վրացական մաքսային վերահսկողության վերականգնման հարցում բանակցային գործընթաց սկսել ոչ թե իր, այլ Աբխազիայի և Հարավային Օսիայի հետ:
Այժմ շվեյցարական կողմի խնդրանքով անորոշ ժամկետով հետաձգվել է ռուս-վրացական բանակցությունների հերթական փուլը։