«Հունիսի 12-ի ընտրություններից հետո հայ – թուրքական հարաբերություններում անակնկալ զարգացումները չեն բացառվում»,- hամոզված է Թուրքիայի առաջատար իշխանամետ պարբերականներից մեկի՝ Sabah-ի մեկնաբան Յավուզ Բայդարը,- հաղորդում է «Ազատություն» ռադիոկայանը:
Իշխող վերնախավի և Թուրքիայի վարչապետ Ռեջեփ Էրդողանի հետ բավական սերտ կապեր ունեցող լրագրողը պնդում է, թե պաշտոնական Երևանի և Անկարայի հարաբերությունները կարող են փակուղուց դուրս գալ, եթե Էրդողանը զգա իր թիմակիցների ճնշումը: «Էրդողանն այս հարցում հաշվի է նստում մի շատ կարևոր գործոնի՝ ադրբեջանցիների հետ: Հայ-թուրքական հարաբերությունների խնդրի վերադարձը օրակարգ, սակայն, կախված է մի հանգամանքից՝ արդյոք իշխող կուսակցության ազդեցիկ անդամների մեջ կգտնվե՞ն գործիչներ, որ կկարողանան նրան համոզել, թե դա անհրաժեշտ է»,- ասում է Բայդարը:
Նա նաև նշում է, որ տարածված այն տեսակետը, թե Էրդողանը սկզբունքորեն դեմ է Հայաստանի հետ հարաբերությունների բարելավմանը, այնքան էլ ճիշտ չէ:
«Էրդողանն ամեն ինչ հասկանում է և հարաբերությունների հաստատմանը դեմ չէ: Նա, սակայն, զուտ էներգետիկ գործոնից ելնելով, չի կարող Ադրբեջանի հետ հաշվի չնստել: Սրան էլ գումարած՝ չենք կարող չնկատել, որ վերջին չորս ամիսներին՝ ողջ քարոզարշավի ընթացքում, փաստորեն, Էրդողանը խիստ ազգայնական հռետորաբանություն էր որդեգրել: Եվ եթե հաշվի առնենք այն փաստը, որ, ի դեմս Էրդողանի, գործ ունենք խիստ պրագմատիկ և ամեն ինչ հաշվարկելու հակված գործչի հետ, ապա համոզված կարող եմ ասել՝ այն պահին, երբ նա քաղաքական շահավետություն զգա, հայ-թուրքական հարաբերությունների շուրջ կրկին առաջընթաց կարձանագրվի: Ավելին, նրա այս ազգայնական հայտարարությունների տոնայնությունը մեղմանալու է հունիսի 12-ի ընտրություններից անմիջապես հետո»,- ասում է Բայդարը:
Ամեն ինչ, սակայն, ըստ Sabah-ի հոդվածագրի, կախված է առաջիկա քվեարկության արդյունքներից:
«Եվ եթե Էրդողանի կուսակցությունը կարողանա 40-50 տոկոս քվե ստանալ, իրադարձություններն էլ կարծես հենց նման ընթացքով են զարգանում, ապա այդ դեպքում Հայաստանի հետ հարաբերություններում կարող են ավելի անհավանական և անսպասելի քայլեր արվել»,- նշում է Յավուզ Բայդարը` խորհուրդ տալով չմոռանալ, որ «սա Թուրքիան է, այստեղ նաև անակնկալներ են լինում»: