Ռուսաստանի նախագահի՝ Աֆրիկայի հետ համագործակցության հարցերով հատուկ ներկայացուցիչ Միխայիլ Մարգելովը Կահիրեում հանդիպում է ունեցել Լիբիայի առաջնորդ Մուամար Քադաֆիի զարմիկի՝ Ահմադ Քադաֆ Ալ-Դամի հետ: Այս մասին հաղորդում է RIA-Novosti գործակալությունը:
«Մեզ համար կարևոր է համեմատել այն դիրքորոշումը, որը մենք լսել ենք Բենղազիում, այն դիրքորոշման հետ, որը հնչեցրել է Ահմադ Քադաֆ Ալ-Դամը՝ որպես մարդ, որը կարող է խոսել Տրիպոլիի այն մասի անունից, որը ռազմավարական մտածողություն ունի Լիբիայի ապագայի հարցում»,- ասել է Մարգելովը:
Մարգելովը նախօրեին բանակցություններ է վարել Բենղազիում Լիբիայի ընդդիմության ղեկավարության հետ: Նա չի մեկնել Տրիպոլի, սակայն կարող է մեկնել հունիսի երկրորդ կեսին, եթե դա նպատակահարմար լինի:
Հիշեցնենք, որ «Մեծ ութնյակի» գագաթնաժողովի ընթացքում անդամ պետությունների նախագահները համաձայնել էին Ռուսաստանի նախագահ Դմիտրի Մեդվեդևի՝ ներլիբիական միջնորդական առաքելությամբ հանդես գալու առաջարկին, որից հետո Մարգելովը մեկնել էր տարածաշրջան՝ փորձելով կարգավորման տարբերակներ ներկայացնել հակամարտող կողմերին: