Բասկետբոլի Հայաստանի ազգային հավաքականը Եվրոպայի առաջնության ընտրական փուլը սկսեց հաղթանակով: Տիրանայում մեր բասկետբոլիստները 80:63 հաշվով առավելության հասան Ալբանիայի ազգային թիմի նկատմամբ:
Արդեն առաջին քառորդում մերոնց առավելությունն ակնհայտ էր: Մասնավորապես առաջին 10 րոպեներից հետո Հայաստանի հավաքականը հաղթում էր 28:18 հաշվով: Երկրորդ քառորդում դաշտի տերերին հաջողվեց հավասարեցնել խաղը և նույնիսկ առաջ անցնել հաշվի մեջ: Հանդիպման առաջին կեսից հետո մեր բասկետբոլիստներն առջևում էին ընդամենը 4 գնդակի տարբերությամբ: Այդուհանդերձ, Հայաստանի հավաքականի գլխավոր մարզիչ Նիկշա Բավցևիչին հաջողվեց կարճ ժամանակում կարգավորել խաղը:
Հայաստանի հավաքականի կազմում գերազանց խաղ ցուցադրեց ռուսական ՄԳՈՒ թիմի ներկայացուցիչ Ալբերտ Թադևոսյանը, որը վաստակեց 23 միավոր՝ ճանաչվելով հանդիպման ամենաարդյունավետ խաղացող: Հերթական անգամ աչքի ընկան նաև Ռայան Բոաթրայթը, Անդրանիկ Չրաբաշն ու Լուկաս Ֆիշերը: Վերջինիս մասնակցությունը Ալբանիայի հետ հանդիպմանը հարցականի տակ էր: Ֆիշերը վնասել էր ձեռքը: Ու չնայած մեր կենտրոնականը խաղում էր վնասվածքով՝ նրան հաջողվեց վաստակել 11 միավոր և 16 անգամ կասեցնել մրցակցի նետումները: Սա բավական բարձր արդյունք է: Նշենք նաև, որ Ֆիշերը հանդիպման ընթացքում չի փոխարինվել՝ խաղալով 40 րոպե: Անդրանիկ Չրաբաշին էլ այս մրցավեճում հաջողվեց վաստակել 18 միավոր:
«Բավարարված եմ թիմի ցուցադրած խաղից, մենք խաղի սկզբից վերահսկում էինք հանդիպման ընթացքը: Թեև մինչև ընդմիջում մրցակցին հաջողվեց հավասարեցնել խաղի հաշիվը և նույնիսկ առավելություն ստանալ, միևնույն է՝ մենք կարողացանք արդյունավետ գործել: Մրցակիցը օղակից անդրադարձող գնդակներին ավելի շատ էր տիրում, և դա մեզ համար խնդիր ստեղծեց, բայց ամեն դեպքում մենք լավ հանդիպում անցկացրինք, և ես ուրախ եմ, որ կարողացանք հաղթել: Շատ լավ խաղ ցուցադրեցին Ռայան Բոաթրայթը, Անդրանիկ Չրաբաշը, բայց պետք է հատուկ շեշտել Ալբերտ Թադևոսյանի հիանալի և արդյունավետ խաղը: Նա այս խաղում պարզապես փայլեց»,- խաղից հետո ասել է Նիկշա Բավցևիչը:
Արդեն նոյեմբերի 26-ին նախկին «Միկա» մարզադահլիճում Հայաստանի հավաքականը ընտրական փուլի երկրորդ հանդիպումն է անցկացնելու՝ մրցելով Դանիայի բավական ուժեղ հավաքականի հետ: Ալբանիայի հետ հանդիպման հերոսը՝ Ալբերտ Թադևոսյանը, հույս ունի, որ առաջիկա խաղում մեր հավաքականի հաղթանակին կնպաստեն երկրպագուները, որոնց աջակցությունը շատ կարևոր է:
«Շատ հետաքրքիր խաղ ստացվեց, որի մեծ մասը մենք առջևում էինք: Մի պահ եղավ, երբ մրցակիցը կարողացավ հաշվի մեջ հավասարվել և նույնիսկ առաջ անցնել, բայց ընդմիջմանը մենք նոր հանձնարարություններ ստացանք մարզչից և կարողացանք ամեն ինչ այնպես անել, ինչպես ծրագրել էինք: Ես շատ ուրախ եմ, որ կարողացա թիմին օգտակար լինել, և հույս ունեմ, որ հետագա խաղերում ևս հաղթելու ենք: Մենք շատ լավ էինք պատրաստվել այս խաղին, չնայած ընդամենը 2-3 օր էինք լիարժեք մարզում անցկացրել, բայց հավաքականների դեպքում դա նորմալ է, քանի որ շատ քիչ ժամանակ ունեն խաղացողները հավաքվելու համար: Այս խաղից ընդամենը 3 օր անց մենք ընդունելու ենք Դանիայի ազգային հավաքականին և պետք է կարողանանք հաղթանակ տոնել նաև այդ խաղում: Կարծում եմ՝ Երևանում տեղի ունեցող Դանիայի դեմ խաղում մեզ կօգնեն նաև մեր երկրպագուները, ովքեր մեզ կաջակցեն մարզադահլիճում»,- ասել է Թադևոսյանը:
Ալբանիայի հետ խաղը կրկին անգամ ապացուցեց, որ Բավցևիչի գլխավորած հավաքականն այսօր ուժեղագույնն է մեր երկրում: Հետևաբար երկրպագուներն ուղղակի պարտավոր են Դանիայի հետ խաղում մեր բասկետբոլիստներին պատշաճ աջակցություն ցուցաբերել: Օգոստոսին տեղի ունեցած աշխարհի առաջնության ընտրական փուլի Բոսնիա և Հերցեգովինայի հետ մրցավեճում «Միկա» մարզադահլիճն ուղղակի եռում էր: Ու չնայած Հայաստանի հավաքականին չհաջողվեց հաղթել, այնուամենայնիվ երկրպագուները չհիասթափվեցին, քանզի մեր հավաքականն արժանի խաղ ցուցադրեց բավական ուժեղ մրցակցի դեմ:
Այսօր Հայաստանի ազգային հավաքականում չեն Արկադի Մկրտիչյանը, Արտյոմ Թավաքալյանը, Կարեն Չիվիչյանը, Մեթյու Մադոյանը, Արամ Արսլանյանը ու Անդրե Սպայթ Մկրտչյանը, Քրիս Յանկուն, Մարսել Հովսեփյանը: ԱՄՆ-ում հանդես եկող Արագադ Աբրամյանը հավաքականի հետ է, սակայն չի մասնակցում հանդիպումներին փաստաթղթերի պատճառով: Սա նշանակում է, որ մեր երկրպագուների ակտիվ աջակցության գործոնն ավելի քան կարևոր է:
Հայաստան-Դանիա հանդիպումը կսկսվի ժամը 19-ին:
