Ֆրանսիական համալսարանի դեմ ուղղված սև PR-ը, որը ղեկավարում են նախորդ տարի աշխատանքից հեռացված 4-5 դասախոսներ, պայմանավորված էր համալսարանում կատարվող մի շարք բարեփոխումներով: Այս մասին այսօր հրավիրված ասուլիսի ընթացքում տեղեկացրեց Հայաստանում Ֆրանսիական համալսարանի ռեկտոր Ժոել լը Մորզըլեկը: Ինչպես նաև ավելացրեց, որ աշխատանքային պայմանագրի ժամկետի լրանալու կապակցությամբ աշխատանքից ազատված դասախոսների վերաբերյալ առաջին ատյանի դատարանի որոշումը բողոքարկելու են վերաքննիչ դատարանում:
Իսկ վերջին միջադեպի հետ կապված, երբ նույն համալսարանի շրջանավարտ Սոկրատ Մխիթարյանը հավատացնում է, թե համալսարանի արտաքին կապերի, կրթական ծրագրերի համակարգման գծով պրոռեկտոր Արայիկ Նավոյանը հարվածել է իրեն, նշեց, որ դրա թիկունքում կանգնած են նախորդ տարի համալսարանից հեռացված 4- 5 դասախոսները և մի քանի շրջանավարտներ, որոնք անօրինական ասոցիացիա են հիմնել: Հետևաբար, այս հարցով էլ են դիմելու դատախազություն իրենց համալսարանի բարի համբավը վերականգնելու համար:
«Այդպես կոչված Ֆրանսիական համալսարանի շրջանավարտների ասոցիացիայի կողմից բարձրացված աղմուկը մասնավորապես պայմանավորված է այն հանգամանքով, որ համալսարանը կանխել է մեր շրջանավարտներին մի խումբ անհատների անձնական Wise բիզնես կոչվող բիզնեսում ներգրավելու փորձերը»,- ավելացրեց Արայիկ Նավոյանը:
Ինչ վերաբերում է, թե տեսախցիկները ֆիքսել են կատարված միջադեպը, վարչաֆինանսական տնօրեն Վաղարշակ Մեյրոյանը նշեց, որ նման բան չէր կարող լինել, որովհետև տեսախցիկները գործելու են սեպտեմբերի 1-ից, և ցավ հայտնեց, որ տեսախցիկներն ավելի շուտ չեն գործել, որպեսզի իրենք փաստացի ապացուցեին, որ Ֆրանսիական համալսարանի արտաքին կապերի, կրթական ծրագրերի համակարգման գծով պրոռեկտրո Արայիկ Նավոյանի և 2010 թ. շրջանավարտ Սոկրատ Մխիթարյանի միջև ծեծկռտուք չի եղել:
Արայիկ Նավոյանն էլ լրացրեց, որ իր և Սոկրատի միջև ակադեմիական բնույթի քննարկում է եղել, որի արդյունքում առաջացել է տարակարծություն և շարունակվել միջանցքում: Սակայն Սոկրատը համալսարանից հեռացել է իրենից և ռեկտորից ներողություն խնդրած:
Ի դեպ, Հայաստանում Ֆրանսիական համալսարանի ռեկտոր Ժոել լը Մորզըլեկի խոսքերով, ուսանողների և դասախոսների միջնորդությունները իր և Արայիկ Նավոյանի հրաժարականի կապակցությամբ չեն կարող դրական արդյունքի հանգեցնել, որովհետև իրենց նշանակում են երկու երկրների ղեկավարությունները:
