Այսօր լրագրողների հետ հանդիպման ժամանակ Հայաստանի դեղարտադրողների և ներմուծողների միության տնօրեն Սամվել Զաքարյանը նշեց, որ Հայաստանում արտադրվում են գրեթե բոլոր դեղաձևերը՝ սկսած ստերիլ, հեղուկ, վերջացրած կարծր դեղաձևերից:
Ըստ ներկայացված տվյալների՝ Հայաստանում այսօր գործում է 14 դեղագործական ընկերություն, որոնք, բացի ներքին շուկաների մատակարարումից, նաև արտահանումներ են իրականացնում ԱՊՀ բոլոր երկրներ, ինչը, ըստ Զաքարյանի, արդեն իսկ վկայում է տեղական արտադրանքի բարձր որակի մասին։
Սակայն հյուրերը՝ Սամվել Զաքարյանը և նոր հրատարակվող «Ֆարմա» դեղագործական գիտական ամսագրի խմբագիր Արամ Ղազարյանը, նշեցին, որ չնայած մեր դեղամիջոցները որակով չեն զիջում, սակայն տեղական շուկայում ունեն ընդամենը մոտ 10-12 % սպառում։
Լրագրողների հարցին, թե դա ինչո՞վ է պայմանավորված, և այդ դեպքում ինչո՞ւ են գրեթե բոլոր բժիշկները դեղատոմս գրելիս պարտադիր նշում արտասահմանյան արտադրության դեղամիջոցը և ոչ թե նույն ազդեցությունն ունեցող տեղական միջոցը, Արամ Ղազարյանը պատասխանեց.
«Ձեզ ուզում եմ հավատացնել, որ Հայաստանում արտադրվող դեղերը համապատասխանում են միջազգային ստանդարտներին: Մենք ոչնչով չենք զիջում: Պատճառն այն է, որ մեր շուկան ավելի փոքր է, բնակչությունը ավելի քիչ է և նորմալ տեղեկացված չէ»։
Օրինակ՝ Եվրամիության երկրներում, փաստեց Արամ Ղազարյանը, բոլոր դեղամիջոցները տեղական արտադրության են, և ներմուծվող դեղամիջոցներ գրեթե չկան:
«Ուղղակի հաճախ Հայաստանում չեն ճանաչում դեղամիջոցները, և միշտ այնպիսի կարծիք կա, որ դրսինը լավն է, քան մեր արտադրանքը. տեղեկացվածության պակաս կա»,- ավելացրեց Սամվել Զաքարյանը։
«Առաջին լրատվականը» վերջինիցս փորձեց ճշտել՝ արդյո՞ք առողջական խնդիրներ ունեցող մարդկանց ոչ լիարժեք տեղեկացվածության, դեպի արտասահմանյան դեղամիջոցները ուղղորդելու համար մեղավոր են հայ բժիշկները, և ի՞նչ օբյեկտիվ կամ սուբյեկտիվ պատճառներ կարող են լինել դրա համար։
«Պատճառները շատ են. նախ՝ բժիշկներն էլ ունեն տեղեկացվածության պակաս։ Բացի այդ, բժիշկների և դեղատների աշխատակիցների ուղղություն տալը բավական մեծ տոկոս է կազմում Հայաստանում, որովհետև իրենք հաճախ այս կամ այն դեղամիջոցի սպառումից բոնուսներ են ստանում, լրացուցիչ գումարներ։ Բժիշկները հաճախ նույնիսկ կոնկրետ տեղերն են ասում, թե որտեղից գնեն տվյալ արտասահմանյան դեղամիջոցը. ասում են՝ կգնաս, անունս կտաս, կասես՝ ես եմ ուղարկել»,- արձագանքեց Հայաստանի դեղարտադրողների և ներմուծողների միության տնօրենը։