ԱՄՆ նախագահ Բարաք Օբաման երեկ հայտարարել է, թե չի բացառում, որ երկիրը կարող է վերապրել տնտեսական անկման նոր փուլ, սակայն կարծում է, որ անհրաժեշտ է ուժեղացնել ամերիկյան տնտեսության զարգացման տեմպերը: Այս հայտարարությունն ամերիկյան ղեկավարն արել է Գերմանիայի կանցլեր Անգելա Մերկելի հետ հանդիպումից հետո: Նա միաժամանակ հանգստացրել է ներդրողներին՝ հայտարարելով, թե համոզված է, որ ապագայում ԱՄՆ տնտեսական իրավիճակը բարելավվելու է: Այս մասին հաղորդում է RBC-ն:
«Ակնհայտ է, որ մենք բախվել ենք որոշ խոչընդոտների»,- Օբամայի խոսքերն է փոխանցում Associated Press գործակալությունը:
Նա հավելել է, որ իր համար պարզ չէ՝ ի՞նչ էին նշանակում աշխատաշուկայի վերջին զարգացումները, և արդյո՞ք դա եզակի երույթ էր, թե՞ նոր տենդենց է արձանագրվում: Նա հիշեցրել է, որ իր աշխատակազմը ձեռնարկում է բոլոր քայլերը՝ բարելավելու տնտեսական իրավիճակը, իսկ ԱՄՆ-ն դանդաղ, սակայն կայուն գնում է դեպի տնտեսական աճ: «Մեր խնդիրն է խուճապի չմատնվել, բուռն և ոչ ադեկվատ չարձագանքել, այլ համոզվել նրանում, որ մենք ունենք ծրագիր և առաջ գնալու նախանշված ճանապարհ»,- ասել է Օբաման: