Համաշխարհային բանկը կանխատեսում է համաշխարհային տնտեսության վերականգնում

«Ազատություն» ռադիոկայանի հայկական ծառայությունն անդրադարձել է Համաշխարհային բանկի «Համաշխարհային տնտեսական հեռանկարներ» (Global Economic Prospects) զեկույցին:

Ըստ զեկույցի, համախառն ներքին արդյունքի (ՀՆԱ) աճը աշխարհում 2010 թվականին արձանագրված 3.8 տոկոսից 2011-ին կնվազի մինչև 3.2 տոկոս, սակայն հաջորդ երկու տարիներին կկայունանա՝ կազմելով 3.6-ական տոկոս: Տնտեսական տեմպերի վրա բացասաբար են ազդել Ճապոնիայում տեղի ունեցած երկրաշարժն ու ցունամին և քաղաքական ցնցումները Մերձավոր Արևելքում ու Հյուսիսային Աֆրիկայում, որոնք դանդաղեցրել են աճը:

Զեկույցի հեղինակներից Էնդրյու Բըրնսը ասում է, որ համաշխարհային տնտեսության աճը մեծապես պայմանավորված է զարգացող երկրների տնտեսությունների գրանցած աճով:

«Տնտեսական աճի հիմնական հատվածը բաժին է ընկնում զարգացող երկրներին, աճի տեմպերն այդ երկրներում կրկնակի ավելի կլինեն, քան զարգացած տնտեսությամբ երկրներում, որպես հետևանք՝ աշխարհի տնտեսական աճի գրեթե 46 տոկոսը 2011-ին կգա հենց զարգացող երկրներից: Սա ոգևորիչ նշան է թե՛ նրանց տնտեսության առողջացման, թե՛ համաշխարհային տնտեսությունում նրանց դերի մեծացման տեսակետից»,- ընդգծում է Բըրնսը:

Զեկույցում նաև ասվում է, որ, ի տարբերություն զարգացող երկրների, առավել զարգացած տնտեսություն ունեցող եվրոպական երկրները շարունակում են պայքարել ճգնաժամի առաջացրած խնդիրների հետ:

Ինչ վերաբերում է Հարավային Կովկասի երկրներին, ապա սպասվում է, որ տարածաշրջանում տնտեսական աճը առաջիկա երեք տարիներին կլինի միջինը 4.5 տոկոս, հումքի բարձր գների և Ռուսաստանում ու Եվրամիությունում տնտեսական վերականգնման հետևանքով:

Նավթով հարուստ Ադրբեջանում կանխատեսվում է 4.2 տոկոս աճ և միևնույն ժամանակ ֆինանսական վիճակի բարելավում:

Հայաստանում և Վրաստանում, ըստ զեկույցի, չնայած սպասվում է 4.3 – 4.9 տոկոս աճ, սակայն երկու երկրների տնտեսություններն էլ զգայուն կլինեն շուկայի տրամադրությունների նկատմամբ այն պատճառով, որ բյուջեի պակասուրդը մեծ է:

Զեկույցը նշում է, որ մի շարք երկրների համար դրամական փոխանցումները արտարժույթի կարևոր աղբյուր են, միևնույն ժամանակ՝ դրանք մեծ ազդեցություն ունեն ներքին պահանջարկի ձևավորման վրա, քանի որ մարդկանց եկամտի կարևոր աղբյուրն են:

Այդպիսի երկրներից է Հայաստանը, որի համախառն ներքին արդյունքի 10 տոկոսը հենց դրամական փոխանցումներն են ապահովում: Նույն ցուցանիշն է նաև Բոսնիա-Հերցեգովինայում, իսկ Ալբանիայի, Ղրղըզստանի, Մոլդովայի և Տաջիկստանի դեպքում ցուցանիշն ավելի բարձր է՝ 18-35 տոկոս: