Հայաստանի պետական ագրարային համալսարանում այսօր ստորագրվել են համագործակցության պայմանագրեր Մխիթար Հերացու անվան Երևանի պետական բժշկական համալսարանի, Հայաստանի պետական տնտեսագիտական համալսարանի, Հայաստանի պետական ագրարային համալսարանի և հանրապետության 26 ավագ դպրոցների միջև:
Կրթության և գիտության նախարար Արմեն Աշոտյանը, կարևորելով կրթական բարեփոխումների ընթացքում հասարակական աջակցությունը և տեղեկացվածությունը, նշել է, որ ոչ մի բարեփոխում չի կարող հաջողության հասնել, եթե այդ բարեփոխման շուրջ ձևավորված չէ հասարակական առողջ մթնոլորտ, և եթե այն համակողմանի չի ներկայացվում հասարակությանը:
Նախարարը նշել է, որ ավագ դպրոցների կայացման և կրթական բազայի բարելավման համար պետական բյուջեից հատկացումներ են արվելու ավագ դպրոցներին: «Բարձրացնելով ավագ դպրոցների ֆինանսավորումը՝ հնարավորություն կստեղծվի ապահովել օրինական կրթական գործընթաց, վերացնել խախտումներն ու պահպանել աշակերտների և աշխատողների իրավունքները, դառնալ հանրակրթական համակարգում յուրահատուկ փարոսներ, որոնք դեպի իրենց կձգեն մեր աշակերտներին և կկարողանան ձևավորել այնպիսի ավանդույթներ, որոնք հավասար պայմաններ կստեղծեն մեր աշակերտների համար, որ նրանք այլևս կրկնուսույցների մոտ հավելյալ պարապելու կարիք չունենան: Ավագ դպրոցների ձևավորումն այն երևույթը կլինի, որը մեզ հնարավորություն կտա հանրակրթությունը բարձրացնել որակապես նոր մակարդակի»,- նշել է նախարարը՝ կարևորելով այն հանգամանքը, որ բուհ ընդունվելու գործընթացը ՀՀ-ում պետք է դառնա շատ պարզ, մատչելի գործընթաց, պետք է կտրուկ էլ ավելի նվազեցվեն կոռուպցիոն ռիսկերը, և ուշադրությունը սևեռվի ավարտական պետական քննությունների վրա, քանի որ շատ կարևոր է իմանալ, թե ովքե՞ր են ավարտում բուհերը:
Այս տարվա ընթացքում համագործակցության հուշագրեր են ստորագրվել ԵՊՃՇՀ-ի և Երևանի թիվ 3 ավագ դպրոցի միջև, ինչպես նաև ԵՊՀ-ի և հանրապետության հինգ ավագ դպրոցների միջև: Այսօրվա պայմանագրերի ստորագրումով հանրապետության ավագ դպրոցների 1/3-ն արդեն կներգրավվի ծրագրի մեջ: Ծրագրով նախատեսվում է համատեղ մասնակցությամբ կազմավորել նպատակային դասարաններ (հոսքեր), որոնց շրջանավարտները բարձրագույն կրթություն կստանան բուհում գործող մասնագիտությունների գծով: Մեթոդական աջակցություն կցուցաբերվեն դպրոցի ուսուցիչներին՝ նրանց համար կազմակերպելով կարճաժամկետ վերապատրաստման դասընթացներ: Յուրաքանչյուր տարի դպրոցների աշակերտների համար կազմակերպվեն «Բաց դռների օր» և ճանաչողական այցեր բուհեր՝ նրանց հնարավորություն ընձեռելով հանդիպելու ֆակուլտետների ղեկավարության և պրոֆեսորադասախոսական կազմի հետ՝ ծանոթանալու կրթական համակարգին և ուսումնառության առկա հնարավորություններին: