Երեկ Լիբիայի առաջնորդ Մուամար Քադաֆին կոչ է արել իր կողմնակիցներին հավաքվել իր բունկերի մոտ: Այս հայտարարությունը նա արել է ՆԱՏՕ-ի ինքնաթիռների կողմից Տրիպոլիի աննախադեպ հրթիռակոծությունից հետո, որը մամուլում անվանեցին «շնորհավորանք Քադաֆիին ծննդյան օրվա կապակցությամբ»: Այս մասին հաղորդում է Reuters գործակալությունը:
«Հանձնվելու փոխարեն, միլիոն անգամ ավելի լավ է մահանալ մարտիրոսի մահով».- հայտարարել է Քադաֆին ձայնային ուղերձի ժամանակ, որը հեռարձակվել է Լիբիայի պետական հեռուստատեսությամբ: «Մենք չենք սկսել այս պատերազմը, սակայն մենք մեր թշնամիներին կհաղթենք»,- ասել է Քադաֆին՝ նշելով, որ ինքը մնալու է Տրիպոլիում՝ չնայած իր կյանքին սպառնացող վտանգին:
Երեկ գիշեր հեռուստատեսությամբ ցուցադրվել են նաև կադրեր, որտեղ Քադաֆին հանդիպում է երկրի ցեղապետերի հետ, ինչը նպատակ ունի ցուցադրել Լիբիայի ժողովրդի միասնությունը: Սակայն ավելի ուշ հայտնի է դարձել, որ Քադաֆիի կառավարությունը լքել է աշխատանքի նախարար Ամին Մանֆուրը: Այս մասին Ժնևում ասել է Լիբիայի հարցով ՄԱԿ-ի ներկայացուցիչը՝ պատասխանելով շվեյցարական Swissinfo գործակալության հարցին: