Մեջբերելով պարենամթերքի համաշխարհային գների վերաբերյալ ՄԱԿ-ի Պարենի և գյուղատնտեսության կազմակերպության (The Food and Agriculture Organization of the United Nations, FAO) երեկ հրապարակած ինդեքսը (Food Outlook June 2011)՝ «Կապիտալ»-ը գրում է, որ մայիսին պարենամթերքի համաշխարհային գները աննշան նվազել են:
«Այսպես՝ մայիսին FAO-ի ինդեքսը կազմել է 232՝ ապրիլյան 235-ի համեմատ: Այն 37%-ով բարձր է 2010թ. մայիսի ցուցանիշից: Պարենամթերքի գների իջեցումը, ըստ FAO-ի փորձագետների, հիմնականում պայմանավորված է շուկայում շաքարի և հացաբույսերի մեծ ծավալների առկայությամբ: Մսի գները շարունակել են աճել, և հնարավոր է՝ հունիսին բացասական ազդեցություն գործեն պարենային գների վրա:
Ըստ FAO-ի՝ պարենամթերքի բարձր ու անկայուն գները հիմնականում կպահպանվեն մինչև 2011թ. վերջ, նաև 2012թ.: Առաջիկա մի քանի ամիսները, ըստ կազմակերպության, որոշիչ նշանակություն կունենան, քանի որ պարզ կլինի, թե գյուղատնտեսական գլխավոր մշակաբույսերի բերքը ինչպիսին կլինի»,- գրում է թերթը: