Թերթը տեղեկացնում է, որ երեկ Արմավիրի մարզպետարանի դիմաց բողոքի ցույց են կազմակերպել անցած հանգստյան օրերին տեղացած ուժեղ կարկուտից տուժած համայնքների բնակիչները: Նրանք պահանջել են, որ ՀՀ իշխանություններն ինչ-որ կերպ օգնեն իրենց:
Արմավիրի մարզպետ Աշոտ Ղահրամանյանը թերթի հետ զրույցում ասել է, որ մարզում հիմնականում տուժել են 22 գյուղերի պտղատու այգիները և ցանքատարածքները: Որոշ գյուղերում ոչնչացել է ողջ բերքը. «Վիճակը ավելի է ծանրացնում այն հանգամանքը, որ գյուղացիների մեծ մասը բանկերից վերցրած վարկեր ունի և այժմ ծանր կացության մեջ են: Գումարներն ամբողջությամբ ծախսվել են, բայց եկամուտի որևէ ակնկալիք չունեն»: Ըստ Ղահրամանյանի՝ ՀՀ գյուղատնտեսության նախարար Սերգո Կարապետյանը պատրաստվում է նամակով դիմել ՀՀ ԿԲ նախագահին՝ նրան առաջարկելով կարկուտից տուժած գյուղերի բնակիչների վարկերը սառեցնել և մարդկանց հնարավորություն տալ, որ գումարները եկող տարի վերադարձնեն: Բայց մինչ այդ գյուղացիները պետք Է կարողանան իրենց ընտանիքների հացի խնդիրը լուծել և ապրել մինչև եկող տարի: