Անդրադառնալով օրեր առաջ իրենց ստացած այն ահազանգին, որով մասնավորապես հայնտել էին, որ Իսակովի 3 հասցեում գտնվող պատմամշակութային հնավայրը (3950 քմ տարածք), որը պարսպապատված է քարով, ուր ներկայումս գործում է «Խաղողապտղագինեգործական գիտական կենտրոն» ՊՈԱԿ-ը, տարածքային ոտնձգությունների թիրախ է դարձել, «Առավոտ»-ը գրում է. «Ըստ ՀՀ ազգային արխիվի տեղեկանքի՝ տարածքը հանդիսանում է Հայաստանի մշակութային հնագույն օջախներից մեկը. Այստեղ է «Սարդարի այգին» և նույն տնտեսության մեջ գտնվող «Աֆրիկյանի տունը»: Այդ տարածքում է գտնվում նաև քարափոր մառան-գինեդարանը, որը յուրօրինակ շինություն է, որտեղ պահպանվում են տարբեր հնության ու տեսակի 27,000 շիշ կոլեկցիոն գինիներ՝ սկսած 1927 թվականից: Մառանը դասվում է աշխարհահռչակ գինեդարանների շարքին: Մառանում տեղադրված են նաև հնագիտական պեղումներով հայտնաբերված եզակի նմուշներ՝ համտեսի թասեր, ձագարներ, կարասներ…»։
«Առավոտ»-ը նաև հայտնում է, որ ՊՈԱԿ-ի տնօրեն Ֆ.Հարությունյանը դիմել է ՀՀ մշակույթի նախարարին, որպեսզի ժամանակի տեսարժան վայրերից մեկը հանդիսացողղ հնավայրը մտցվի պատմության և մշակույթի անշարժ հուշարձանների ցուցակում: Սակայն ՊՈԱԿ-ի տարածբից 255քմ-ն հայտնվել է ինչ-որ մեկի «պարսպի ետևում»:
Երեկ հնաբնակ նորագյուղցիներն «Առավոտ»-ի թղթակցին ակնարկել են 90-ականներին Գերմանիայում դրամաշորթության համար մեղադրվող և Ինտերպոլով հետախուզման մեջ գտնվող «Բոգո» մականունով Ռուբեն Սիմոնյանի (ով հետագայում անձնագրային ազգանունը փոխել, դարձել է Կոստանյան)՝ նշված տարածքում և տարածքից դուրս ակտիվ շինարարություն սկսելը:
Թերթը հայտնում է, որ Երևանի Նորագյուղ թաղում մեկը մյուսի ետևից օբյեկտներ են «ծլում»՝ առանց օրենքով նախատեսված նախագծային նորմերի համապատասխան ցուցանիշների։ Մասնավորապես, Իսակովի պողոտայում գտնվող ավտոկայանի մոտ բազմաթիվ քարաշեն ու ապակեպատ օբյեկտները պատկանում են հենց նրան:
«Ըստ պաշտոնական պատասխանի, հնավայրից խլված հողատարածքներից մեկը պատկանում է Ռոման Մուրադյանին: Թե որ արժանիքների համար է արգելոց-հնավայրից տարածք տրվել, հայտնի չէ:
Լուսանկարման պահին մենք կանգնած էինք գինեդարանի «տանիքին», որը ցանկացած պահի կարող է փլուզվել՝ կուտակված շինարարական աղբի ծանրության պատճառով: Տարածքը չնայած ունի պահակ, սակայն գիտկենտրոնի երկաթյա սև դուռը բացում են տարածքը նվաճած, ըստ նորագյուղցիների, Աժ պատգամավոր Սամվել Ալեքսանյանի (մականունը չի փոխվել) «Հացատան» աշխատակիցները: Հնավայրի պարսպի ետևում մեկ այլ շինություն էլ կա. դատելով վրան տեղադրված ցուցանակից, կարծես ծառայում է որպես «հյուրանոց»: Հենց ավտոկայանի տարածքում մի քանի ապակեպատ կրպակներ ու քարաշեն ինչ-որ կառույցներ էլ կան: Դրանցից մեկն էլ դեռ զավթված վիճակում, արդեն գլխավերևում «Ապտեկա» անունով ցուցանակ ունի: Խոսակցություններ են շրջանառվում, որ «Բոգոն» Նորագյուղի խեղճուկրակ բնակիչ Արմենի կառուցած տունն էլ է ծեծելով ձեռքից խլել. այն պարզապես անօրինական է եղել, «Բոգոն» էլ այն «իրենով է արել» ու օրինականացրել: Այդ օրվանից էլ մոտ մեկ տարի է, որ Արմենը լքել է Հայաստանը՝ մեկնելով ԱՄՆ: Թե ինչպես է լինում, որ մեկին ամեն ինչ հաջողվում է, մյուսին՝ ոչինչ, դեռ գոնե իրավական տեսանկյունից հասկանալի չէ»,- գրում է «Առավոտ»-ը և հիշեցնում. «Բոգոյի» անվանը հանդիպում ենք նաև քաղաքապետի ընտրություններից հետո՝ հուլիսին: Թերթերից մեկի տեղեկությունների համաձայն՝ հուլիսի 23-ին, ժամը 16-ից 17-ի սահմաններում Էրեբունի համայնքում Աժ պատգամավոր Սամվել Ալեքսանյանի մոտ 30 կողմնակիցներ Ալեքսանյանի մերձավորներից «Բոգոյի» հետ էրեբունի համայնքի Ռոստովյան-Աթոյան խաչմերուկում իջել են իրենց մեքենաներից, և խմբից 2 հոգի կրակ է բացել «Սամբիստ» մականունով Կարեն Բագրատունյանի վրա, ով ընդամենը 1.5 ամիս առաջ է ազատվել բանտից («Հժ»): Այս տարվա մարտի 19-ին էլ «Բոգոն» աննկատ չմնաց. Երևանի «Charlotte» ռեստորանում Կարեն Խաչատրյանը, որը աշխատում է Հարկային ծառայությունում, հարբած վիճակում ընկերների հետ հայհոյանքներով վայելել է շաբաթ երեկոն, ինչը դուր չի եկել կողքի սեղանին նստած «Բոգոյին»: Վերջինս զգուշացրել է, որ Կարեն Խաչատրյանը դադարեցնի հայհոյանքը, ինչին Կ. Խաչատրյանը չի համաձայնել, պատասխանել է և բանավեճը վերածվել է ծեծկռտուքի՝ «Բոգոյի» և Խաչատրյանի միջև: Մի քանի «մուշտի» էլ գործին խառնված ոստիկաններն են ստացել («Աոաջին լրատվական»): «Բոգոն» արդեն Կոստանյան անձնագրով փորձել է թռչել ՌԴ մայրաքաղաք՝ Մոսկվա, սակայն 2 անգամ էլ ձերբակալվել ու շուտով բաց են թողնվել: Նա նաև 2010 թ. փորձել է Մեղրիով հատել Հայաստան-Իրան սահմանը, սակայն կրկին չի հաջողվել, բռնել ու նորից բաց են թողել: Եվ հիմա ազատության մեջ ազատ շինարարություն է անում, որ «բոգատի» դառնա»։