Մեծարգո Հովիկ Աբրահամյան, բարեկամներ,
Շնորհակալություն, որ միացել եք մեզ՝ նշելու Ամերիկայի Միացյալ Նահանգների ծնունդը:
Հուլիսի 4-ին դեռ մի քանի շաբաթ կա, բայց ամերիկյան անկախության թողած ժառանգությունը կարելի է տոնել տարվա բոլոր օրերին: Անկախության տոնին ամերիկացիները միավորվում են իրենց ընտանիքների, բարեկամների, համայնքների հետ, վերհիշում մեր պատմությունը և վերահաստատում մեր հավատարմությունը ժողովրդավարության, ազատության ու խաղաղության հանդեպ:
Ամերիկացիները, ինչպես և բոլոր ժողովուրդները, բարձր են գնահատում այս համընդհանուր արժեքները: Ուստի տեղին է, որ այս օրը մենք բացենք մեր դռները մեր բարեկամների, հարևանների առաջ այստեղ և աշխարհի այլ վայրերում ու միասին նշենք այս տոնը:
Մեր բախտն ու ճակատագիրը այսօր առավել քան երբևէ փոխկապակցված են: Մենք կիսում ենք առավել խաղաղ ու առավել բարեկեցիկ ապագա կերտելու պատասխանատվությունը:
Հայերի ու ամերիկացիների միջև ամուր կապեր կան, որոնք առկա են եղել Հայաստանի անկախացումից շատ առաջ: Իսկ վերջին քսան տարիների ընթացքում Միացյալ Նահանգները հետևողականորեն աջակցել է Հայաստանի ժողովրդավարացմանը, տնտեսական աճին ու անվտանգությանը:
Այսօրվա տոնակատարությունը խորհրդանշում է մեր շարունակական գործընկերությունը: Չկա անհասանելի նպատակ, չկա անհաղթահարելի մարտահրավեր, եթե մենք հետամուտ ենք ընդհանուր նպատակի, եթե մենք փնտրում ենք ընդհանուր եզրեր:
Ձեզանից շատերը գիտեն, որ ես շուտով մեկնում եմ Հայաստանից, բայց Հայաստանը կմնա իմ սրտում: Կուզենայի մնալ այստեղ ու երկրի շարունակական առաջընթացի ականատեսը լինեի, հատկապես առաջիկա երկու շրջադարձային տարիներին:
Թույլ տվեք առիթից օգտվելով շնորհավորել Հայաստանին անկախության քսանամյա տարելիցի առիթով և ամենալավն ու բարին մաղթել հայ ժողովրդին վաղվա Հայաստանը կերտելու գործում:
Եվ այս առիթով եկեք միասին բաժակ բարձրացնենք մեր երկու երկրների անկախության համար, մեր բարեկամության համար. բարեկամություն, որ հիմնված է ժողովրդավարության, ազատության և խաղաղության հարցում փոխադարձ օգնության և հարգանքի վրա: