«Առավոտ»-ը տեղեկացնում է, որ Գեղարքունիքի մարզի խնդիրներին ծանոթանալու նպատակով մի խումբ լրագրողներ «People in need» կազմակերպության նախաձեռնությամբ այցելել են մարզ և շրջակա գյուղեր։ Մատնացույց անելով Գավառի քարուքանդ ճանապարհները՝ բնակիչներն ասել են, որ դրանք վտանգավոր են դառնում հատկապես ձմռանը։ Այս առումով գավառցիները նույնիսկ հումոր են արել և պատմել, որ իրենց երեխաները ծնվում են ճանապարհին. «Ձմռան ամիսներին էլ կանայք զգուշանում են երեխա ունենալ»։
Բնակիչների խոսքով՝ թեև երիտասարդ քաղաքապետ ունեն, բայց երբևէ չեն կարողանում նրա հետ հանդիպել։ Գանձակի գյուղապետն էլ իր խոսքում ասել է. «Գյուղը հոգեվարք է ապրում, արյամբ վերադարձված հողն անտեր է մնացել, համայնքի վարչական տարածքի վարելահողերի 70 տոկոսը անմշակ է»։ Իսկ ամենամեծ վտանգը համարել է այն, որ մարդկանց հավատը կորել է։