Քիչ առաջ Հայաստանի երիտասարդական հավաքականը «Հանրապետական» մարզադաշտում 10 հոգով ջախջախիչ պարտության մատնեց Չեռնոգորիայի հավաքականին և «Եվրո-2013»-ի ընտրական փուլի առաջին իսկ խաղում վաստակեց առաջին 3 միավորը: Այո, հարգելի ֆուտբոլասեր, Հայաստանը ֆուտբոլ ունի, հայկական ֆուտբոլը` ապագա. դա այսօր ապացուցեցին մեր երիտասարդները: Ամբողջ թիմը ողջ հանդիպման ընթացքում գերազանց ֆուտբոլ ցուցադրեց:
Արդեն երրորդ րոպեին մոտ տարածությունից գլխի հարվածով հանդիպման հաշիվը բացեց Էդգար Մալաքյանը: 16-րդ րոպեին Արտակ Ալեքսանյանը սիմուլիացիայի համար դեղին քարտով պատժվեց, իսկ 7 րոպե անց նույն Արտակ Ալեքսանյանը կոպիտ խաղի համար ստացավ երկրերդ դեղին քարտն ու հեռացվեց խաղադաշտից:
Բոլորը սպասում էին, որ կարմիր քարտից հետո Ռաֆայել Նազարյանը գոնե տակտիկական փոփոխություն կանի խաղում, սակայն մեր ընտրանու գլխավոր մարզիչն այլ կարծիքի էր և նա չսխալվեց: Բրավո Ռաֆայել Նազարյան:
Ընդմիջումից անմիջապես հետո Գագիկ Դալբաշյանի փոխարեն խաղադաշտ մտավ Վալտեր Պողոսյանը:
50-րդ րոպեին Էդգար Մալաքյանը ևս մեկ անգամ հայ երկրպագուներին ստիպեց «գոլ» բղավել: 2:0 հաշվի ժամանակ կրկին ոչ մի տակտիկական փոփոխություն: Հայաստանի հավաքականը առիթը բաց չէր թողնում նոր գրոհներ ու հակագրոհներ կազմակերպելու, ինչը շուտով տվեց իր արդյունքը. 77-րդ րոպեին Հովհաննես Հովհաննիսյանը հաշիվը դարձրեց խոշոր: 2 րոպե անց հյուրերին հաջողվեց կրճատել այն, սակայն 82-րդ րոպեին Վալտեր Պողոսյանը ձևակերպեց խաղի վերջնական հաշիվը` Հայաստան-Չերնեգորիա` 4:1:
Եվս մեկ անգամ` բրավո՛ Հայաստանի հավաքական, բրավո՛ Ռաֆայել Նազարյան:
Լուսանկարը` Հակոբ Բերբերյանի (Armenpress)