Վրացական News Georgia կայքի փոխանցմամբ՝ ամռան գալստյան հետ հաճախակիացել են «Կոբրա» սողունների վերահսկման քաղաքային ծառայությանը՝ իրենց տներում օձեր հայտնաբերած Թբիլիսիի տարբեր շրջանների բնակիչների դիմումները։
Այս կապակցությամբ «Կոբրա»-ի աշխատակիցը նշել է. «Մենք մեր գործունեությունը սկսել ենք մայիսից և շարունակում ենք մինչև հոկտեմբերի վերջը։ Պատահում են օրեր, որ օրական մեր օգնությանն է դիմում 7-12 մարդ։ Թեժ գծով մեզ դիմում են քաղաքի տարբեր շրջաններից և հայտնում իրենց տներում օձերի հայտնաբերման մասին։
Առավել շոգ օրերին մեզ միջին հաշվով դիմում է 15 մարդ։ Սովորաբար, միայն 40 տոկոս դեպքերում է հաջողվում բռնել օձերին»։
Նշվում է, որ նախորդ տարի օձերը հարձակում էին գործել Վրաստանի Կենտրոնական ընտրական հանձնաժողովի շենքի վրա։ Հենց շինության մուտքի մոտ հայտնաբերվել էր կարմրավուն մեկ մետրանոց օձ։
Տներից հավաքած օձերին փոխադրում են Թբիլիսիի կենդանաբանական այգի, ուր և գտնվում է «Կոբրա»-ի գրասենյակը։ Ապա օձերին բաց են թողնում քաղաքից հեռու գտնվող ամայի վայրերում։
Ընդհանուր առմամբ, Վրաստանում բնակվում է սողունների 52 տեսակ, որից 3-ը՝ կրիա, 27-ը՝ մողես, իսկ 23-ը՝ օձ։