Գիտնականներն ապացուցել են, որ ժամանակակից մարդը հասուն տարիքի հասնում է ավելի դանդաղ, քան նեանդերթալցիները, ինչը, հավանական է, Homo sapiens-ի ևս մեկ առավելությունն է մարդու այդ արխայիկ տիպի նկատմամբ: Այս մասին, ինչպես հաղորդում է РИА Новости-ն, ասվում է Proceedings of the National Academy of Sciences ամսագրում հրապարակված հոդվածում:
Առաջին նմանատիպ ենթադրությունները գիտնականների շրջանում ծագել են դեռևս 2007 թ. նեանդերթալցիների ատամների կտրվածքը ուսումնասիրելու արդյունքում: Այս մեթոդը, սակայն, թույլ չէր տալիս հստակ եզրակացություններ անել արխայիկ մարդկանց հասունացման արագության վերաբերյալ:
Նոր հրապարակման հեղինակները` Հարվարդի համալսարանից Թանեյ Սմիթի գլխավորությամբ, գտել են ատամների էմալում օրերի օղակների քանակը հետազոտելու մեթոդը: Ըստ այդմ, պարզվել է, որ սեղան կաթնատամները ժամանակակից մարդու մոտ դուրս են գալիս 3 տարեկանում, նեանդերթալցիների մոտ` 2.5 տարեկանում, իսկ հիմնական սեղանատամները` համապատասխանաբար 10 և 8 տարեկանում:
Սա, ըստ գիտնականների, վկայում է այն մասին, որ նեանդերթալցիներն ավելի արագ են ծերացել, ինչով էլ պայմանավորված է ժամանակակից մարդկանց վերարտադրողական առավելությունը նրանց նկատմամբ, քանզի այդպիսով երիտասարդ ծնողներն ավելի շատ ժամանակ ունեն երեխային մեծացնելու և դաստիարակելու համար: