Eurasianet-ի փոխանցմամբ՝ Ռուսաստանի Պաշտպանության նախարության Գլխավոր շտաբի օպերատիվ պլանավորման պետ, գեներալ-լեյտենանտ Անդրեյ Տրետյակը հայտարարել է, որ նախորդ տարի ՀԱՊԿ-ի կողմից Ղրղզստանի իրադարձություններին չմիջամտելը չի կարող նախադեպ դառնալ Ղարաբաղի համար.
«Հակամարտության վերսկսման հնարավորությունը բարձր է, սակայն դա աստիճանաբար նվազում է Ռուսաստանի ջանքերի արդյունքում։ Ես համաձայն չեմ նրա հետ, թե Ռուսաստանի ու Հայաստանի հարաբերությունները վատթարանում են, Ռուսաստանը հավատարիմ է մնում այդ երկրի առջև ստանձնած իր պարտականություններին։
Ոչ ոք չպետք է նախորդ տարվա ամռանը ղրղզստանյան իրադարձություններին ՀԱՊԿ-ի չմիջամտելը դիտարկի որպես նախադեպ Ղարաբաղի համար, քանի որ սա այլ իրավիճակ է։ ՀԱՊԿ-ն կարող է առավել կարևոր դեր խաղալ Հարավային Կովկասում»։
Հիշեցնենք, որ այս տարվա հունվարի կեսերին ռուս փորձագետ, Կովկասի խնդիրների կենտրոնի գիտաշխատող Նիկոլայ Սիլաևն ադրբեջանական լրատվամիջոցներին տված հարցազրույցում նշել էր, որ պատերազմի վերսկսման դեպքում, եթե այն ընդգրկի նաև Հայաստանի տարածքը, Ռուսաստանը կհայտնվի շատ անհարմար իրավիճակում, ինչի համար էլ Մոսկվան ամեն գնով պետք է խուսափի պատերազմի վերսկսումից.
«Եթե զինված բախումները սահմանափակվեն միայն Ղարաբաղի տարածքով, ապա Ռուսաստանը չի միջամտի, իսկ ահա եթե Ադրբեջանը ռազմական հարված հասցնի ՀԱՊԿ գծով Ռուսաստանի դաշնակից Հայաստանին, ապա դա արդեն լրիվ այլ բան է»: