Ադրբեջանական APA լրատվական գործակալության փոխանցմամբ՝ ԵԱՀԿ Մինսկի խմբի համանախագահներ Բեռնարի Ֆասիեն (Ֆրանսիա), Ռոբերտ Բրադտկեն (ԱՄՆ) և Իգոր Պոպովը (Ռուսաստան) մեկնել են հայ-ադրբեջանական շփման գիծ՝ հետևելու այսօր այնտեղ իրականացվող դիտարկմանը։
Բարդայում նրանք հարցազրույց են տվել լրագրողներին։ Բեռնար Ֆասիեն նշել է, որ ԵԱՀԿ Մինսկի խմբի համանախագահող երկրների նախագահների հնչեցրած հայտարարության համաձայն, եկել է հակամարտության կարգավորմանն առնչվող հիմնարար սկզբունքների ընդունման ժամանակը.
«Մենք հանդիպեցինք Ադրբեջանի նախագահի հետ և քննարկեցինք խնդրի կարգավորումը։ Բաքվից մենք մեկնում ենք Ստեփանակերտ, որտեղից էլ՝ Երևան, ուր և կշարունակենք հիմնարար սկզբունքների համաձայնեցման ուղղությամբ մեր աշխատանքները»։
Ռոբերտ Բրադտկեն, մեկնաբանելով վերջին շրջանում տարածում գտած պատերազմի վերսկսման հնարավորության մասին լուրերը, նշել է, որ բոլորը պետք է իմանան, որ իրենք հանդես են գալիս միայն հակամարտության խաղաղ կարգավորման օգտին։
Իսկ Իգոր Պոպովն իր հերթին նշել է, որ, ԱՄՆ-ի և Ֆրանսիայի նման, Ռուսաստանը ևս աջակցում է միայն խնդրի խաղաղ կարգավորմանը։
Հայ-ադրբեջանական շփման գծում անցկացվելիք դիտարկման ժամանակ էլ համանախագահները և ԵԱՀԿ գործող նախագահի անձնական ներկայացուցիչ Անջեյ Կասպրշիկը (Լեհաստան) պատրաստվում են անցնել դեպի հայկական կողմ։
Հիշեցնենք, որ հունիսի 4-ին Ադրբեջանի պաշտպանության նախարարության մամլո ծառայության պետ Էլդար Սաբիրօղլուն Ադրբեջանի ճակատամերձ զորամասերից մեկում կազմակերպված կոնֆերանսի ժամանակ հայտարարել էր, որ Ղարաբաղում նոր պատերազմն «անխուսափելի» է։
