Ուզբեկստանի առաջին նախագահի կրտսեր դուստրը` Լոլա Կարիմովա-Տիլյաևան, Հելոուինը տոնել է Քվենտին Տարանտինոյի «Սպանել Բիլին» ֆիլմի հերոսներից վարձու մարդասպան Սև Մամբայի կոստյումով: Կոստյումի լուսանկարով Լոլան կիսվել է «Ինստագրամի» իր էջում: Լուսանկարն Ուզբեկստանում հակասական քննարկումների առիթ է տվել, քանի որ սկսած 2011 թվականից Հելոուինի տոնակատարումն Ուզբեկստանում արգելված է, և արգելքի կողմնակիցներից է եղել նաև Լոլայի հայրը` Ուզբեկստանի առաջին նախագահ Իսլամ Կարիմովը:
Նշվում է, որ սա առաջին դեպքը չէ, երբ Լոլա Կարիմովա-Տիլյաևան իր վարքագծով ցնցում է ուզբեկական հասարակությանը: Ավելի վաղ նա բավական բաց զգեստով լուսանկար էր հրապարակել, որի վերնամասը կարված էր մարմնագույն նուրբ կտորից:
Այն ժամանակ շատերի համար այդ զգեստը գեղեցիկ էր, մինչդեռ գտնվեցին մարդիկ, ընդ որում, ոչ քիչ թվով, ովքեր հայտարարեցին, որ ՅՈՒՆԵՍԿՕ-ում Ուզբեկստանի մշտական ներկայացուցիչ, դիվանագետ Լոլա Կարիմովան պետք է զերծ մնա նման սադրիչ լուսանկարներից:
