Հայաստանյան դեղագործական շուկայում հիմնական առաջատարները «Natali farm» և «Alfa Farm» ընկերություններն են, որոնք հիմնականում զբաղված են դեղերի ներկրմամբ։ Հայաստանում կան նաև 17 դեղ արտադրող ընկերություններ, որոնք այնքան էլ մրցունակ չեն շուկայում վերոնշյալ գերիշխողների առկայության պայմաններում։ Հայաստանի դեղագործության մրցունակության միջազգային երրորդ համաժողովում ներկայացված էին նաև տեղական դեղարտադրողները։ Տեղական դեղարտադրողները մեզ հետ զրույցում նշեցին, որ շուկայում մրցակցելու համար պետք է որակյալ արտադրանք ներկայացնել սպառողին։ «Վիտամաքս» ընկերության բժշկական ներկայացուցչության ղեկավար Արփինե Մուրադյանը նշեց, որ իրենց արտադրանքը արտահանում են նաև Ճապոնիա, Ուկրաինա, Բելառուս, Ռուսաստան, Ղազախստան։ Նրա խոսքերով՝ միշտ պետք է խրախուսել տեղական արտադրողին, իսկ տեղական արտադրողն էլ պետք է որակի վրա ուշադրություն դարձնի, քանզի եթե դեղորայքը արդյունավետ է, ապա այն ավելի շատ կսպառվի բնակչության կողմից։
Հայաստանյան «Էսկուլապ» դեղագործական ընկերության ներկայացուցիչ Աննա Հովակիմյանն էլ տեղեկացրեց, որ իրենց արտադրությունը զարգացնելու համար նոր գործարան են հիմնել, որը համպատասխանում է GMP ստանդարտներին։ Նա ևս նշեց, որ որակը շատ կարևոր է շուկայում մրցունակ լինելու համար։ Հովակիմյանի խոսքերով՝ այսօր Հայաստանում արդեն անցել է այն տենդենցը, երբ նախապատվությունը տալիս էին արտասահմանյան դեղերին. արդեն կարևորվում է դեղի որակը և արդյունավետությունը։