Օրեր առաջ Ադրբեջանը կրկին հայտարարություն էր տարածել, թե ղարաբաղյան խնդրի լուծման հարցում պատերազմն այլընտրանք չունի: Դրան զուգահեռ միջազգային հանրությունը լավատեսական հայտարարություններ է անում՝ շեշտելով, թե Կազանի հանդիպման ժամանակ պետք է ավարտին հասցվեն հիմնարար սկզբունքների շուրջ աշխատանքները:
«Առաջին լրատվական»-ի հետ զրույցում ԱԺ ՀՀԿ խմբակցության պատգամավոր Արտակ Դավթյանը կարծիք հայտնեց, որ նման հայտարարություններով Ադրբեջանն ակնհայտորեն հակառակվում է միջազգային հանրությանը և գնում ընդհարման վերջինիս կարծիքի հետ:
«Միջազգային հանրությունը հստակ է ասել, որ ԼՂ հարցի կարգավորումը հնարավոր է միայն խաղաղ բանակցությունների ճանապարհով, իսկ Ադրբեջանը խոսում է պատերազմի մասին: Պատերազմը տրորված ճանապարհ է, քանզի Ադրբեջանը մեկ անգամ գնացել է այդ ճանապարհով, ինչի արդյունքներն այսօր ակնհայտ են: Եվ ինչպես հայտարարել է հանրապետության նախագահը, այդ ճանապարհը ևս մեկ անգամ սկսելը կնշանակի Ադրբեջանի կողմից նոր տարածքների կորուստ: Ադրբեջանի համար պատերազմի արդյունքները նույնը կլինեն, դեռ ավելի սոսկալի, քան նախորդի դեպքում: Ադրբեջանում կգան նոր իշխանություններ, որոնք ավելի սթափ կմտածեն և կժխտեն պատերազմական լուծման ճանապարհը»:
Ինչ վերաբերում է ադրբեջանական պատերազմական հայտարարությունների ֆոնին միջազգային հանրության դրսևորած լավատեսությանը, Դավթյանը նկատեց, թե միջազգային հանրությունը բազմիցս նշել է, որ իրենք ամեն ինչ կանեն, որպեսզի ցանկացած համաձայնություն, որը ձեռք կբերվի Հայաստանի և Ադրբեջանի միջև, պահպանվի. «Բայց նրանք դրա ձեռքբերումը տեսնում են բանակցությունների արդյունքում, այլ ոչ թե պատերզմական ճանապարհով»: