Հունիսի 9-ին Կենտրոն և Նորք Մարաշ վարչական շրջանների ընդհանուր իրավասության դատարանը կհրապարակվի Տիգրան Արզաքանցյանն ընդդեմ «Երկիր» օրաթերթի դատական գործով դատական ակտը: «Եվ եթե նույնիսկ մեկ դրամ, մեկ լումայի չափով էլ դատարանը բավարարի հայցը, օրաթերթը բողոքարկելու է այն՝ հասնելով մինչև Եվրոդատարան»,- լրագրողների հետ հանդիպման ժամանակ նշեց «Երկիր» թերթի գլխավոր խմբագիր Բագրատ Եսայանը և փաստաբան Լիանա Գրիգորյանը:
Նրանք կպահանջեն հատուցել այն բոլոր դատական ծախսերը, որոնք կատարվել են դատարանում իրենց շահերը պաշտպանելու համար, քանի որ դատարանում իրենք կարողացել են ապացուցել այն, ինչի մասին գրվել էր թերթում:
Հիշեցնենք, որ Արզաքանցյանը դատարանում պնդում է, թե «Երկիր» օրաթերթը «131 դեմք ու դիմակ» վերնագրով հոդվածով վիրավորել է իր պատիվն ու արժանապատվությունը: Նա հատկապես վիրավորվել էր «ստիլյագ», «Ռուսաստանից աղջիկներ տանող-բերող», «քյավառա բարբառին տիրապետող», «ծեծ ուտելու սովորություն ունեցող»արտահայտություններից:
Վիրավորվել էր նաև նախկին վարչապետ Հրանտ Բագրատյանի՝ իր հասցեին արված «Էդ լակոտը խայտառակում է մեր երկրի կոնյակի պատիվը» արտահայտությունից:
Ի դեպ, թերթի գլխավոր խմբագիրը այդ արտահայտության առիթով միաժամանակ նշեց, որ «Երկիր»-ը հրապարակել է Հրանտ Բագրատյանի ուղարկած հերքումը, թե նման բան ինքը չի ասել: Բանախոսները նաև նշեցին, որ դատաքննության ընթացքում Արզաքանցյանի մասին նոր հանգամանքներ են ի հայտ եկել. օրինակ Հայաստանում և արտերկրում նրա ունեցած սեփականության, Ֆրանսիայում երթևեկության խախտումների մասին փաստեր, ինչպես նաև ոչ ճիշտ խոսելու սովորության վերաբերյալ. այդ ամենը կասկած է հարուցել՝ պատգամավորը որևէ լեզվի տիրապետելու ընդունակություն ունի՞, թե՞ ոչ:
Բանախոսները հայտնեցին, որ Պետեկամուտների կոմիտեից իրենք խնդրել են տրամադրել պատգամավորի ունեցվածքի վերաբերյալ հայտարարագրերը, որպեսզի պարզեն, թե պատգամավորն ինչ սեփականություն ունի, ինչպե՞ս է վաստակել դրանք ձեռքբերելու գումարները և ի՞նչ 22 մլն. դրամի բարեգործության մասին է խոսքը, որի մասին բարձրաձայնում է վիրավորված Արզաքանցյանը:
«Հրապարակային քաղաքական գործիչները պետք է ավելի շատ գտնվեն ուշադրության կենտրոնում, որ ընտրողներն իմանան, թե ում են ձայն տալիս: Վստահ եմ որ ընտրողները եթե իմանային՝ նրա կերպարն իրականում ինչպիսին է, ձայն չէր ստանա ոչ միայն նա, այլև այն կուսակցությունը, որի շարքերում է ինքը»,- նշեց Բագրատ Եսայանը:
Ի դեպ, ասուլիսին հրավիրված պատգամավորի իրավապաշտպան Վահե Հովսեփյանը չէր ցանկացել ներկա գտնվել ասուլիսին: