ՀՀ Ազգային ժողովի նախագահ Հովիկ Աբրահամյանի կարգադրությամբ, բարեգործական և հայանպաստ երկարամյա ակտիվ գործունեության համար ազգային բարերար Ալբեր Բոյաջյանը պարգևատրվել է Հայաստանի Հանրապետության Ազգային ժողովի Պատվո մեդալով:
Հունիսի 7-ին ՀՀ Ազգային ժողովում տեղի ունեցավ պարգևատրման հանդիսավոր արարողությունը: Բարերարին հանձնելով ԱԺ բարձրագույն պարգևը` խորհրդարանի նախագահ Հովիկ Աբրահամյանն ասաց.
«Հարգելի պարոն Բոյաջյան,
Ողջունում եմ Ձեզ Հայաստանի Հանրապետության Ազգային ժողովում: Շատ ուրախ ենք հյուրընկալել մի մարդու, որն իր անուրանալի ներդրումն ունի հայոց անկախ պետականության, Հայրենիք-Սփյուռք կապերի ամրապնդման, Հայաստանի և Արցախի սոցիալ-տնտեսական զարգացման գործում:
Դուք կազմակերպիչն ու մասնակիցն եք բազմաթիվ հայանպաստ ձեռնարկների և մշտապես թիկունք եք կանգնել համազգային գաղափարների իրականացմանը թե՛ Հայաստանի ու Լեռնային Ղարաբաղի Հանրապետություններում և թե՛ Ամերիկայի Միացյալ Նահանգներում:
Մենք բարձր ենք գնահատում Ձեր ակտիվ մասնակցությունը «Հայաստան» համահայկական հիմնադրամի ազգանպաստ ու հայապահպան գործունեությանը»:
Նշելով, որ այս տարի լրանում է Հայաստանի երրորդ Հանրապետության 20-ամյակը` ԱԺ նախագահն ասաց, որ անկախության հռչակումով առավել ևս պարտադրված ենք միասնականության, որովհետև պետության անկախության հարատևման հիմնական երաշխիքը ժողովրդի միասնությունն է: Կարևոր չէ, թե որտեղ են գտնվում այդ ժողովրդի հատվածները` Հայաստանո՞ւմ, ԱՄՆ-ո՞ւմ, Ֆրանսիայո՞ւմ, թե՞ Սիրիայում, որովհետև կա նրանց միավորող և միևնույն ժամանակ քաջալերող անկախ հայրենիքը: ՙԴուք մեր ժողովրդի այն զավակներից եք, ով մշտապես գիտակցում է հայրենիքի շահը, երբեք չի մոռանում իր արմատները՝ միաժամանակ մնալով այն երկրի օրինապաշտ ու լիարժեք քաղաքացի, որտեղ ապրում և գործում է` դրանով իսկ կամրջելով միջպետական կապերը: Այսօր հայ-ամերիկյան հարաբերությունների առկա բարձր մակարդակի ապահովման մեջ նշանակալի է նաև Ձեր անձնական դերակատարությունը,- դիմելով բարերարին՝ ասաց Հովիկ Աբրահամյանը:
«Հարգելի պարոն Բոյաջյան, Ձեր ծառայությունները մատուցելով հայրենիքին, Դուք բնավ չեք ակնկալել որևէ փոխհատուցում՝ գիտակցելով, որ, անկախ գտնվելու վայրից, հայրենիքին սատար կանգնելն ու նրա հզորացմանը նպաստելը յուրաքանչյուր հայի սրտի թելադրանքն է»:
Հայաստանի Հանրապետության Ազգային ժողովի և անձամբ իր անունից շնորհակալություն հայտնելով Ալբեր Բոյաջյանին հայանպաստ ու ազգանվեր գործունեության համար և շնորհավորելով ՀՀ Ազգային ժողովի Պատվո մեդալի արժանանալու համար՝ ԱԺ նախագահ Հովիկ Աբրահամյանը հույս հայտնեց, որ ՀՀ ԱԺ բարձրագույն պարգևն իր ուրույն տեղը կզբաղեցնի Հայաստանի, Լեռնային Ղարաբաղի և Ամերիկայի Միացյալ Նահանգների իշխանություններից բարերարի ստացած բարձր պարգևների շարքում:
Շնորհակալություն հայտնելով բարձր պատվի և պարգևի համար՝ Ալբեր Բոյաջյանը պատրաստակամություն հայտնեց այսուհետ ևս շարունակել մասնակցություն ունենալ հայրենիքի և հայ ժողովրդի հզորացմանն ուղղված ծրագրերին:
