Միացյալ Նահանգները չի հայտարարել, թե մտադիր է դադարեցնել իր մասնակցությունն Իրանի միջուկային համաձայնագրին, և շարունակում է հետամուտ լինել իր ստանձնած հանձնառություններին. պատասխանելով «Առաջին լրատվական»-ի հարցմանը՝ տեղեկացրել են Հայաստանում ԱՄՆ դեսպանությունից:
«Առաջին լրատվական»-ը խնդրել էր Հայաստանում Միացյալ Նահանգների դիվանագիտական ներկայացուցչությանը պարզաբանել ԱՄՆ-ի դիրքորոշումը՝ կապված Իրանի միջուկային համաձայնագրի հետ և այս առնչությամբ նախագահ Դոնալդ Թրամփի հայտարարությունները:
Միացյալ Նահանգները պատրաստվո՞ւմ է արդյոք դադարեցնել իր մասնակցությունը Իրանի միջուկային համաձայնագրին, և ի՞նչ ընթացակարգ է դա պահանջում: Համաձայնագրից ԱՄՆ-ի դուրս գալը նշանակում է, որ Իրանի դեմ ամերիկյան պատժամիջոցները կվերականգնվե՞ն, և ընդհանրապես դրա հետևանքով համաձայնագիրը կարո՞ղ է լուծարվել:
Հարցին ԱՄՆ դեսպանությունից պատասխանել են. «Մենք չենք հայտարարել, թե մտադիր ենք դադարեցնել մեր մասնակցությունը Իրանի միջուկային համաձայնագրին՝ Գործողությունների համապարփակ ծրագրին, և շարունակում ենք հետամուտ լինել մեր ստանձնած հանձնառություններին: Նախագահը կարծում է, որ Համաձայնագրով Իրանը շատ բան ստացավ՝ դրա դիմաց շատ չնչին բան անելով: Դա է պատճառը, որ նա Կոնգրեսին չներկայացրեց հաստատում, որի պահանջը սահմանված է 2015 թ. ընդունված Իրանի միջուկային համաձայնագրի վերանայման մասին ԱՄՆ օրենքով: Օրենքով սահմանված պահանջի կատարումը ներպետական տիրույթի հարց է և Իրանի միջուկային համաձայնագրի մաս չի հանդիսանում, ուստի, դա ավտոմատ կերպով չի հանգեցնի պատժամիջոցների վերականգնման»:
Ամերիկյան դեսպանատունը հստակ պատասխան չի տվել հարցին, թե Իրանի ուղղությամբ Թրամփի վարչակազմի քաղաքականությունը կարո՞ղ է ազդել հայ-իրանական հարաբերությունների վրա կամ սահմանափակել Հայաստանի և Իրանի համագործակցությունը տնտեսության և այլ ոլորտներում, բայց նշել է, որ «Իրանի հարցում Միացյալ Նահանգների նոր ռազմավարությունը նպատակաուղղված է Իրանի ապակայունացնող ազդեցության չեզոքացմանը և վերջինիս ագրեսիայի, մասնավորապես ահաբեկչությանը և զինյալներին աջակցելու ջանքերի զսպմանը»:
«Մենք նոր լիցք կհաղորդենք ավանդական դաշինքներին և տարածաշրջանային գործընկերություններին՝ Իրանի սադրիչ քայլերի դեմ և կփորձենք տարածաշրջանում վերականգնել ուժերի կայուն հավասարակշռությունը: Մենք կաշխատենք մերժել Իրանի և հատկապես Իսլամական հեղափոխության պահապանների կորպուսի (ԻՀՊԿ) չարակամ գործողություններին ուղղվող ֆինանսավորումը և թույլ չտալ ԻՀՊԿ-ի գործողությունները, որոնք ուղղված են իրանական ժողովրդի հարստության շորթմանը: Մենք կհակազդենք Միացյալ Նահանգների, մեր դաշնակիցների ու գործընկերների դեմ ուղղված սպառնալիքներին՝ կապված բալիստիկ հրթիռների և այլ ասիմետրիկ զենքերի հետ: Մենք կհամախմբենք միջազգային հանրությանը՝ դատապարտելու ԻՀՊԿ-ի կողմից թույլ տրվող մարդու իրավունքների կոպիտ խախտումները և չհիմնավորված մեղադրանքներով ամերիկյան քաղաքացիների ու այլ օտարերկրացիների անարդարացիորեն կալանքի տակ պահելու հանգամանքը: Պաշտոնը ստանձնելուց ի վեր նախագահ Թրամփը և իր վարչակազմը ծավալուն ու անկեղծ քննարկումներ են ունեցել մեր դաշնակիցների ու գործընկերների հետ՝ Իրանի միջուկային համաձայնագրի ու ընդհանուր առմամբ Իրանի վերաբերյալ:
Մենք հստակ պատկերացնում ենք մեր դաշնակիցների ու գործընկերների դիրքորոշումը և փորձել ենք հստակ ներկայացնել նաև մեր դիրքորոշումը: Իրանը լուրջ սպառնալիք է Միացյալ Նահանգների և Եվրոպայի, Մերձավոր Արևելքի ու մեր այլ դաշնակիցների ու գործընկերների համար: Նախագահ Թրամփի առաջ քաշած ռազմավարությունն իրականացնելու համար մենք խիստ կարևորում ենք մեր դաշնակիցների ու գործընկերների օժանդակությունը: Այս հարցերի շուրջ մենք արդեն սկսել ենք քննարկումներ մեր դաշնակիցներից ու գործընկերներից շատերի հետ և ձգտում ենք հնարավորինս արագ առաջ շարժվել այս հարցերի շուրջ»,- ասվում է դեսպանության պատասխանի մեջ:
Իսկ ինչո՞վ է պայմանավորված Միացյալ Նահանգների և Թուրքիայի հարաբերությունների վատթարացումը վերջին շրջանում: ՆԱՏՕ-ի՝ իր մի շարք դաշնակիցների հետ Թուրքիայի լարված հարաբերությունները կարո՞ղ են բացասաբար ազդել ընդհանուր տարածաշրջանի անվտանգության և կայունության վրա:
Այս հարցի առնչությամբ պաշտոնական Վաշինգտոնի դիրքորոշումը հետևյալն է. «Թուրքիան ՆԱՏՕ-ի շրջանակում առանցքային դաշնակից է և կարևորագույն տարածաշրջանային գործընկեր: Տևական ժամանակ ձևավորված մեր դաշինքը կառուցված է ընդհանուր շահերի ու փոխադարձ հարգանքի հիմքերի վրա»:
