Ադրբեջանական Salam News գործակալության փոխանցմամբ, Ադրբեջանի նախագահի աշխատակազմի արտաքին կապերի հարցերով բաժնի ղեկավար Նովրուզ Մամեդովը լրագրողներին հայտարարել է, որ պաշտոնական Բաքուն որոշակի առաջընթաց է ակնկալում հունիսի 25-ին Կազանում կայանալիք Հայաստանի և Ադրբեջանի նախագահների հանդիպումից.
«Ես չեմ բացառում, որ կազանյան բանակցությունների արդյունքում ստորագրվի փաստաթուղթ։ Դա «կախված» է Հայաստանից։ Այժմ գլխավոր հարցն այն է, որ թե՛ Ադրբեջանը, թե՛ միջազգային կազմակերպությունները, թե՛ միջնորդները հանդես են գալիս ստատուս-քվոյի փոփոխման օգտին։
Հուսով եմ, որ Հայաստանն իր մեջ «ուժ կգտնի»՝ կառուցողական դիրքորոշում ցուցաբերելու և խնդրի լուծման հարցում առաջընթաց գրանցելու համար»։
Հիշեցնենք, որ մինչ նախագահների կազանյան հանդիպումը՝ հունիսի 11-ին, Մոսկվայում կայանալու է Հայաստանի, Ադրբեջանի ու Ռուսաստանի արտգործնախարարների հանդիպումը։