Սերժ Սարգսյանի աշխատակազմի ղեկավար Կարեն Կարապետյանը հայտարարել է, թե ընդդիմության հետ երկխոսությունը վաղուց սկսված է և հաջողությամբ ընթանում է, ու կարիք չկա բանակցություններ սկսել պատվիրակությունների մակարդակով, ինչն ըստ Կարեն Կարապետյանի, հարիր է միջպետական հարաբերություններին, ոչ թե ընդդիմություն իշխանություն համագործակցությանը:
Կարելի՞ է արդյոք սա համարել նախագահ Սերժ Սարգսյանի պաշտոնական պատասխան, այսինքն՝ ընդդիմության առաջարկի մերժում: Կարելի է, եթե նկատի առնենք, որ խոսքը նախագահի աշխատակազմի ղեկավարի մասին է: Սակայն Հայաստանում այդ ամենը, այսինքն կոնկրետ ֆունկցիոնալ կարգավիճակները, շատ պայմանական են և Հայաստանում ասենք պաշտպանության նախարարը կարող է վարչապետից և ԱԺ նախագահից ավելի մեծ իշխանություն ունենալ` ընդ որում քաղաքական իշխանություն:
Այդպիսի ժամանակներ եղել են Հայաստանում: Այլ օրինակներ էլ կարելի է բերել, որոնցից պարզ կլինի, որ Հայաստանում իշխանության իրական քաղաքականության խոսնակները որոշվում են ոչ թե ըստ զբաղեցրած պաշտոնի և ֆունկցիոնալ կարգավիճակի, այլ ըստ նպատակահարմարության: Իսկ փաստն այն է, որ վերջին ամիսներին Սերժ Սարգսյանն ինքն է նպատակահարմար գտել անմիջականորեն հաղորդակցվել ընդդիմության հետ: Վկան՝ նրա հայտարարությունները, որոնցից առաջ իշխանությունը միշտ էլ այսպես ասած թերահավատորեն կամ մեծամտորեն է խոսել ընդդիմության հետ երկխոսելու մասին, խոսել է այսպես ասած ուժեղի դիրքերից, իսկ վերջում խոսել է Սերժ Սարգսյանն ու ասել, որ Ազատության հրապարակը պետք է բացվի, որ մարտի 1-ի քննությունը պետք է նոր թափ ստանա, որ քաղբանտարկյալները կարող են ազատվել:
Այնպես որ, ներկայումս հետաքրքիր չէ, թե ինչ են ասում Կարեն Կարապետյանը, Գալուստ Սահակյանը, Էդուարդ Շարմազանովը կամ մյուսները: Հետաքրքիր է, թե երբ և ինչ է ասելու Սերժ Սարգսյանն ինքը: Իսկ Սերժ Սարգսյանն առայժմ լռում է, և հավանական է, որ նա ինչ որ բան կասի Կազանում Ղարաբաղի հակամարտության վերաբերյալ եռակողմ հանդիպումից անմիջապես առաջ կամ հետո:
Ակնհայտ է, որ Հայաստանի ներքաղաքական հունիսյան օրակարգում Կազանի հանդիպումն ունենալու է կարևոր նշանակություն: Սակայն հավանական է նաև, որ Սերժ Սարգսյանը խոսի նաև հենց ԵԱՀԿ Մինսկի խմբի համանախագահների հետ հանդիպումից հետո, մինչև Կազանի հանդիպման նախօրեն: Ամեն ինչ կախված է նրանից, թե համանախագահները, որոնք հունիսի 9-ին լինելու են Հայաստանում, ինչ կխոսեն Սերժ Սարգսյանի հետ, ինչ կառաջարկեն կամ ինչ հարցեր կտան: Ըստ այդմ էլ երևի թե Սերժ Սարգսյանը կկոսմնորոշվի, կամ ստիպված կլինի կողմնորոշվել ներքաղաքական անցուդարձի հարցում: