Մոտ մեկ շաբաթ է` հեղինակավոր Time հանդեսը առաջարկում է ընթերցողներին ընտրել անցնող 2010 թ. թիվ մեկ քաղաքական ու հասարակական գործչին` Տարվա մարդուն,- հայտնում է «Ազատություն» ռ/կ-ն։
Մեկշաբաթյա քվեարկության արդյունքներով, ըստ ընթերցողների, այդ տիտղոսի ամենաարժանի հավակնորդը Թուրքիայի վարչապետ Ռեջեփ էրդողանն է. վերջին տվյալներով, նրա օգտին քվեարկել է արդեն 110 հազարից ավելի ընթերցող, մինչդեռ ԱՄՆ նախագահ Բարաք Օբաման ընթերցողների քվեարկությամբ գրավել է 6-րդ հորիզոնականը, Մեծ Բրիտանիայի վարչապետ Դեյվիդ Քեմերոնը` 13-րդ, Աֆղանստանի նախագահ Համիդ Քարզայը` 23-րդ։
Ինտերնետում իրականացվող այս հարցումը ընդամենը խորհրդանշական բնույթ ունի. չնայած դրա արդյունքներին` Տարվա մարդուն որոշելու է Time-ի խմբագրակազմը, որի կարծիքը կարող է և չհամընկնել ընթերցողների նախասիրությունների հետ։
Սակայն փաստ է, որ Time-ը էրդողանին արդեն իսկ առանձնացրել և ներառել է տարվա առավել ազդեցիկ 25 գործիչների ցանկում` բարձր գնահատելով Թուրքիայի վարչապետի քայլերը ոչ միայն միջազգային ասպարեզում, այլև երկրի ներսում` հատկապես տնտեսական ոլորտում։
«Երբ Իսրայելի զինուժը հարձակման ենթարկեց Գազայի հատված մարդասիրական բեռներ տեղափոխող թուրքական «Մարմարա» նավը, կանխատեսելի էր, որ Էրդողանը հանդես կգա հայտարարությամբ, քանի որ միջադեպի զոհ դարձան Թուրքիայի շուրջ մեկ տասնյակ քաղաքացիներ, – գրում է Time-ն ու ընդգծում,- սակայն անակնկալ էր էրդողանի հայտարարությունների կոշտ տոնը, որոնցով նա երբեմնի դաշնակից երկրին` Իսրայելին, մեղադրեց պետական մակարդակով անմարդկային ահաբեկչություն իրականացնելու մեջ»։
«Իրականում սա միայն մեկ դրվագ էր Թուրքիայի կողմից 2010 թ. իրականացված տասնյակ առանցքային քայլերից, որոնցով Անկարան փորձեց ի ցույց դնել իր դիվանագիտական կարողությունները», – գրել է հեղինակավոր ամսագիրն ու հիշատակել Իրանի միջուկային ծրագրի շուրջ Բրազիլիայի հետ ձեռք բերված պայմանավորվածությունը։
«Խթանելով ձեռներեցությունը սեփական երկրում և հարելով ազգայնական թևին, որը մինչ այժմ հերքում է Հայոց ցեղասպանությունը, Էրդողանը ցույց է տալիս, որ Թուրքիան այլևս չի ամաչում ի ցույց դնել իր կշիռն ու կարողությունը ողջ Մերձավոր Արևելքում»,- գրում է Time-ը։
Թե ում կտա խմբագրակազմը հեղինակավոր տիտղոսը, հայտնի կդառնա դեկտեմբերին:
