«Էխո Մոսկվի» ռադիոկայանի գլխավոր խմբագրի տեղակալ Տատյանա Ֆելգենհաուրենին դանակահարած տղամարդու դեմ քրեական գործ է հարուցվել, հայտարարել է Մոսկվայի քննչական կոմիտեն: Նրան ձերբակալել և ոստիկանությանն են հանձնել ռադիոկայանի անվտանգության աշխատակիցները: Այս մասին հայտնում է tvrain.ru-ն:
Ֆելգենհաուերին վիրահատել են, նրա կյանքին վտանգ չի սպառնում:
«Սա ավազակային հարձակում էր մեր լրագրողի վրա: Դանակով զինված տղամարդը նախ ներքևում հարձակվել է անվտանգության աշխատակցի վրա, ապա մտել ռադիոկայանի սենյակներից մեկը և դանակով հարվածել Տատյանայի կոկորդին», – ասել է «Էխո Մոսկվի» ռադիոկայանի գլխավոր խմբագիր Ալեքսեյ Վենեդիկտովը:
Հարձակվողն Իսրայելի մոտ 40 տարեկան քաղաքացի Բորիս Գրիցն է, ում արդեն հարցաքննել են։ Ըստ ԶԼՄ-ների՝ նա հոգեկան լուրջ խնդիրներ ունի։ Նա հայտարարել է, որ հաղորդավարի հետ «հեռազգայական կապ» ուներ դեռևս 2012 թվականից և որ Ֆելգենահաուերը նրան պարզապես հետապնդում էր որպես տղամարդու։
ՌԴ ՆԳՆ-ը հայտարարել է, որ հարձակումն իրականացվել է անձնական թշնամանքի հողի վրա, թեև ոստիկանությունը նշել է, որ այլ վարկածներ ևս դիտարկվում են:
Քրեական գործ է հարուցվել սպանության փորձ հոդվածով։
Ֆելգենհաուերի դեմ հարձակումն այսօր դատապարտել է ԵԱՀԿ մամլո ազատության հարցերով ներկայացուցիչ Արլեմ Դեզիրը՝ նշելով, որ չպետք է հանդուրժել լրագրողների նկատմամբ բռնությունը:
