«Հրապարակ»-ը զրուցել է ԱԺ պատգամավոր, ԱԺ արտաքին հարաբերությունների հանձնաժողովի փոխնախագահ Վազգեն Կարախանյանի հետ, ով թերթին ասել է, որ պետք է ժողովրդին զերծ պահել արտահերթ ընտրություններից՝ «բա մեղք չի՞ էս ժողովուրդը»,- մեջբերում է «Հրապարակ»-ը։ Թերթի հարցին, թե ինչպես է պետք հասկանալ ՀՀԿ-ի հայտարարությունը, թե պատվիրակություն չի լինելու և արդյո՞ք Հանրապետականը դեմ է երկխոսությանը, որ հրաժարվում է պատվիրակություն կազմելուց, ԱԺ պատգամավորը պատասխանել է. «Ե՞րբ է Հանրապետականն այդպիսի բան ասել, որ դեմ է երկխոսությանը: Ժողովրդի մի զանգված ուզում է հանդիպի ժողովրդի հսկայական մեծ զանգվածների կամ նրանց թիմի անդամների հետ: Ի՞նչ խնդիր կա»։
Հարցին, թե ով է առաջնորդը ժողովրդի հսկայական մեծ զանգվածների, պատգամավորը պատասխանել է. «Նրանք, ովքեր Աժ ընտրություններում և նախագահականում կարողացան հսկայական մեծ տոկոսներ, քվեներ վերցնել հարազատ ժողովրդից»: Իսկ թերթի այն հարցին, թե ինչ ձևով կարողացան վերցնել ժողովրդից քվեները և արդյո՞ք նաև Մարտի 1-ի միջոցով, Վ. Կարախանյանը պատասխանել է. «Շատ արդար ու ազնիվ, վճիտ, պարզ, զուլալ, ինչպես մեր հայոց լեռներն են: Մինչև Մարտի 1-ը ընտրություններ են տեղի ունեցել, ու էդ ընտրություններում հաղթանակ է տարել Հանրապետական թեկնածուն։ Ինչի՞ մասին է խոսքը»։ Այն հարցին, թե հնարավո՞ր է՝ Հանրապետականը չի ուզում պատվիրակություն կազմել, քանի որ գիտի, որ ստիպված Է լինելու բանակցել արտահերթ ընտրությունների շուրջ և ուստի ինչ-որ կերպ փորձում է վիժեցնել այս պրոցեսը, Վ.Կարախանյանը ասել է. «Ինչի՞ մասին Է խոսքը, ի՞նչ արտահերթ ընտրություններ: Մեր երկրում ինչ-որ տենց ցնցումնե՞ր կան, արեգակն արդեն արևելքից չի՞ բարձրանում: Ի՞նչ ա պատահել, որ պիտի նոր, արտահերթ ընտրություններ լինեն, և վերջիվերջո ինչքա՞ն ժամանակ ա մնացել ընտրություններին: Ախր էդ ընտրությունները դուք էնքան սովորական բան եք համարում, որ մենք պետք է անընդհատ զբաղվենք ընտրություններով՝ ընտրություններ, վերընտրություններ, քննություն, հետո վերաքննություն հանձնենք: Է՛, բա մեղք չի՞ էս ժողովուրդը: ժողովրդին ի՞նչ ա պետք՝ սոցիալական խնդիրներ լուծելը»:
