Ֆրանսիական «Յառաջ» պարբերականի փոխանցմամբ՝ աշխարհի երրորդ մեծագոյն աճուրդի տունը հանդիսացող Heritage Auctions-ը Նյու Յորքում հոկտեմբեր 17-ին վաճառքի է դնում հայկական եզակի ձեռագիր մատյաններ ու տպագիր հատորներ:
Ձեռագրերից մեկը մագաղաթի վրա մանրանկարչությամբ զարդարված 1659-ի Ավետարան է (637 էջ)՝ ընդօրինակված Գանձակի Գրիգոր վարդապետի կողմից: Ավետարանի վերջնական արժեքը, աճուրդի կազմակերպիչների կարծիքով, կարող է հասնել մինչև 25 հազար դոլարի:
Մյուս ձեռագիրը 16-րդ դարի (1584) ընդօրինակված 571 էջանոց Ավետարան է` կազմված Հովհաննես վարդապետի կողմից: Ավետարանի էջերից 15-ը զարդարված են Ներսես անվամբ հոգևորականի մանրանկարներով: Աճուրդի տան հաղորդագրության մէջ նշվում է, որ աշխատանքը կատարված է Բարձր Հայքի Խնդրակատար Ս. Աստվածածին վանքում: Այս Ավետարանի նախնական գինը ավելի քան 20 հազար դոլար է:
Այլ անթվակիր մի ձեռագիր գրված է «բոլորագիր» տառատեսակով` Բարսեղ անունով գրչի կողմից: Այն թվագրված է 13-16-րդ դարերով: Սա ևս կգնահատվի ավելի քան 20 հազար դոլար:
Աճուրդի են դրված նաև Ամստերդամում 1714-1715-ին տպված 838 էջանոց «Գիրք Սաղմոսաց»-ից մի օրինակ, «Հայոց պատարագի խորհրդատետր» (1677) հատորից օրինակ, ինչպես նաև՝ մի «Ժամագիրք» (մոտավորապես 1837) և Հովսեփ Էմինի կողմից անգլերենով գրված ինքնակենսագրականից մի օրինակ, որ լույս է տեսել Լոնդոնում 1792-ին (640 էջ):
