«Ես կարծում եմ՝ մարդն իր պատիվը շատ ավելի պիտի գնահատի։ Նորմալ մարդու համար իր պատիվը փողով չի գնահատվում»,- «Առաջին լրատվական»-ի հետ զրույցում, անդրադառնալով դատարանի հրապարակած վճռին, ըստ որի Սեդրակ և Բելլա Քոչարյանների հայցն ընդդեմ «Ժամանակ» օրաթերթի մասնակի բավարարվեց, համոզմունք հայտնեց Հայաստանի լիբերալ կուսակցության առաջնորդ Հովհաննես Հովհաննիսյանը։
Քաղաքական գործիչը նշեց, որ իր համար շատ ավելի ընդունելի կլիներ, երբ Քոչարյանները հայց ներկայացնեին դատարան իսկապես իրենց պատիվը, բարի անունը վերականգնելու համար և, օրինակ, պահանջեին մեկ դրամ, կամ մեկ դոլար։
«Բայց եթե որևէ մեկն իր պատիվը սկսեց փողով գնահատել և դրանով փորձեց ճնշել, վատություն անել կամ լռեցնել մամուլը, ես այդ մարդկանց չեմ հասկանում»-, ասում է Հովհաննես Հովհաննիսյանը։
Ըստ նրա՝ արդեն 13 տարի է Հայաստանում գործող ռեժիմն այս կերպ ցույց է տալիս իր մոտեցումը սեփական ժողովրդի և սեփական երկրի հանդեպ, թե ոնց են տեսնում, պատկերացնում սեփական, երկիրը, սեփական պետությունը։
